Header Nepal rastra bank Adv

बाखं - कन्हय्‌या सुथ

नारद वज्राचार्य

टेबुल ।
टेबुलया द्यःने छपाः किपा ।
किपाया न्ह्यःने च्यानाच्वन छप्वाः देवा ।
चुपचाप । चुपचाप । चुपचाप ।

xxx

पिने –

ततःधंगु धाकुफय् वल । धुफ्वः दन । वा वल । प्वँ वल । सिन्दुर जात्रा जुल ....गथे म्हिगः म्हीग नं जू ।

तर,

थ्व फुक्कं खं बेखबर । निस्तब्ध मौन । थ्व क्वथा ।

क्वथाय् मनूत दु । तर सकलें सकलें सुम्क सुम्क । कुप्प । मौन । छम्ह लिसे मेम्ह तातापाक्क । छखे छखे । बिस्कं बिस्कं ।

फुक्कसिया मिखा मिखाय् जायेक जायेक ख्वबि दु । नुगलय् तयांतयेथाय् मदयेक पीडा दु । ग्याः चिकु नं दु । अले सकलें सकलें आतंकित नं जुयाच्वंगु दु ।

क्वथा शून्य खः । छतिं हाःसः मदु । तर नं अन सुनामि बाः वैच्वंगु दु । दिगिदिगि भ्वखाय् ब्वैच्वंगु दु । न्यंक नुगलय् नुगलय् कोलाहल न्यनाच्वंगु दु ।

आः छु जुइगु खः ?  गथे जुइगु खः ? यायेगु छु खः आः ? सुनां नं छुं धायेफुगु मदु । सुयागु नं बुद्धिं छुं ज्या यानाच्वंगु मदु ।

सकलें सकलें जिल्ल जिल्ल । वातां वातां ।

चुपचाप । चुपचाप । चुपचाप ।

xxx

खः । सकसिनं स्यू । वःपिं वनेमाः । तर, थन वंम्ह अजुचाया पुक्क वन । मनं मखना कथं वन ।

सेनां धूप्वः चिने थें प्लाष्टिकलय् सीम्ह प्वः चिनाः मसानय् उइत ज्वना वन ।

कुताः । सी बाजं । सनां वनेगु । बिचाः फय्गु । ल्वःचाः । म्ह्याय्‌मस्त ख्वयाः वयेगु । न्हय्नुमा तयेगु । श्राद्ध आदि इत्यादि सकतां सकतां थ्व महामारीया खुसिं चुइका यन ।

xxx

टेबुल ।
टेबुलया द्यःने छपाः किपा ।
किपाया न्ह्यःने च्यानाच्वन देवा छप्वाः ।
फिरफिर फिरफिर, फसं संकाच्वन च्यानाच्वंगु देवा ।

बाचा फपुले धुंकल । सुयां मिखाय् न्ह्यः मदु । फुकसिया मिखा ध्वाखा चाः थें चालाच्वंगु दु ।

सकलें हे त्रसित व आतंकित जुयाच्वंगु दु । मस्यू, कन्हय्‌या सुथं सुया सुया पिसिआर रिपोर्ट पोजिटिभ ज्वनाः वैगु खः ?

–०–