zero media family planning adv

बाँकेया नरैनापुरय् १२० खा छेँ च्यात

नेवा: अनलाइन न्युज – ललेन्द्र शाक्य | २०७७ चैत्र २२, आइतबार १२:३६:२८

जुम्लाया तिलाय् नं मिँ च्यात

बाँकेया नरैनापुरय् मिँ च्यानाः १२० खा छेँ च्यानाः ध्वस्त जूगु दु । मिँ स्यायेगु झ्वलय् प्यम्ह मनू घाःपाः नं जूगु दु ।

नरैनापुर गाउँपालिका वडा ल्याः ४ या खोदवा गामय् शनिवाः न्हिनय् ३ः३० ता इलय् मिँ याःगु खःसा वंगु चान्हय् १ ता इलय् पूर्ण रुपं मिँ स्याःगु खः । मिँपाखें करोडौं क्षति जूगु प्रारम्भिक अनुमान याःगु दु ।

बाँकेया प्रहरी उपरीक्षक ओमबहादुर रानां धाःगु दु, मुचुल्का याये ल्यंदनि तर मिँपाखें करोडौंया क्षति जूगु अनुमान यानागु दु ।

मिँपाखें अन्नबाली, सिँ, वसः कापः लिसें नगद च्यानाः नष्ट जूगु दु । मिँ स्यायेत न्यागः दमकल छ्यःगु खः ।

स्थानीय फकिर खाँया गोठपाखें च्याःगु मिँ बस्तीन्यंकं च्याःवंगु खः ।

जुम्लाय् मिँ च्यानाः ३५ खा छेँ नष्ट

अथेहे, जुम्लाया तिला गाउँपालिका ९ ढिपुगांया मुल्लीइ मिँ च्यानाः ३५ खा छेँ नष्ट जूगु दु ।

७५ खा छेँ दूगु मुल्लीइ ३५ खा छेँ च्यानाः नष्ट जुइधुंकूगु वडाध्यक्ष शेरबहादुर बोहोरां जानकारी ब्यूगु दुसा वया कथं मिँ नियन्त्रणं पिने लाःगु दु ।

माक्व लः मदुगु हुनिं मिँ स्याये मफयाच्वंगु खः । छेँया पलि लिकायेगु व चा तयाः मिँ स्यायेगु कुतः जुयाच्वंगु धाःगु दु । वडाध्यक्ष बोहरां धाःगु दु, मिँ नियन्त्रण पिने दु । स्यायेगु नितिं लः मदु, छेँ च्याःगु मिँ स्वयाः च्वनेगुया विकल्प मदु ।

थ्वसिबें न्ह्यः तिला ७ पोखरी गांया गोठीइ मिँ च्यानाः ३१ खा छेँ नष्ट जूगु खः ।

 

Categorized in दुर्घटना-अपराध