zero media family planning adv

बलिउड स्टार अभिनेता इरफान खान मन्त

नेवा: अनलाइन न्युज | २०७७ बैशाख १८, बिहिबार १५:०९:५८

भारतीय अभिनेता इरफान खान वासः यायेगु झ्वलय् बुधवाः सुथय् ५३ दँया उमेरय् मन्त ।

स्वास्थ्यय् समस्या वयेधुंकाः मंगलवाः इरफानयात मुम्बईया कोकिलाबेन अस्पतालय् भर्ना याःगु खःसा बुधवाः सुथय् मदुगु खः ।

इरफान खानयात कोलोन इन्फेक्सन जूगु खः । वंगु दँ लण्डनय् वासः याकाः लिहाँ वयेधुंकाः इरफान मुम्बईया कोकिलाबेन अस्पतालया हे डाक्टरया निगरानीइ नियमित रुपं स्वास्थ्य जाँच याकाच्वंगु खः ।

वंगु शनिवाः सुथय् जक इरफान खानया मां सइदा बेगम ९५ दँया उमेरय् मदुगु खः । कोरोना भाइरस संक्रमण रोकथाम व नियन्त्रणया नितिं तयातःगु लकडाउनया हुनिं इरफान थः मांया अन्तिम संस्कारय् वने मफूगु खः ।

इरफान खान भिडियो कन्फरेन्सपाखें मांया अन्तिम संस्कारय् सहभागी जूगु भारतीय संचारमाध्यमं जानकारी ब्यूगु खः ।

इरफान खान न्यूरोएन्डोक्राइन ट्युमरपाखें पीडित जुयाच्वंगु खः । इरफान थुगु ल्वय्या उपचार लण्डनय् हे याकाः वयाच्वंगु खः ।

सन् २०१८ या मार्चय् इरफानयाके थुगु ल्वय् खनेदूगु थःम्हेस्यां हे ट्वीटपाखें जानकारी ब्यूगु खः ।

Categorized in कला