newayatataad 2

बलात्कारया सजाय थप, मिलापत्र याकीम्हेसित स्वदँ जेल

नेवा: अनलाइन न्युज – ललेन्द्र शाक्य | २०७७ मङ्सिर ८, सोमबार १३:११:५६

बलात्कारय् दुथ्याःम्हेसिगु सजाय अप्वयेकेगु व मिलापत्र याकूम्हेसित अपराध कानूनया दायराय हयेगु कथं सरकारं अध्यादेश हःगु दु ।

मन्त्रिपरिषदया आइतवाः च्वंगु बैठकं अध्यादेश राष्ट्रपति न्ह्यःने सिफारिस याःगु कानून, न्याय व संसदीय मामिलामन्त्री शिवमाया तुम्बाहाम्फें जानकारी ब्यूगु दु । राष्ट्रपतिपाखें प्रमाणित जुइधुंकाः लागू जुइ ।

कानून मन्त्रालय स्रोतया कथं ज्येष्ठ नागरिक ऐन, मुलुकी अपराध संहिता व मुलुकी फौजदारी कार्यविधि संहितायात संशोधन यायेगु कथं अध्यादेश हयेत्यंगु खः ।

मिजं नं बलात्कृत जुइफु

अध्यादेशं मिजं नं बलात्कृत जुइफूगु स्वीकार यासें दण्ड सजायया व्यवस्था याःगु दु । थ्वसिबें न्ह्यः दण्डसम्बन्धी व्यवस्थाय् मिसामचा वा मिसा धैगु खँग्वः दूगुलि अध्यादेशपाखें उकियात संशोधन यानाः सुं व्यक्ति धैगु खँग्वः तःगु दु ।

असोजया स्वंगूगु वा जनकपुरय् छम्ह मिजं ५ दँया मिजंमचाया बलात्कार लिपा हत्या याःगु सार्वजनिक जूगु खः । अन्तर्राष्ट्रिय अभ्यासयात नं स्वयाः सुनां सुंयात बलात्कार यायेफु धैगु न्ह्यथनातःगु खः ।

मिलापत्र याकीम्हेसित स्वदँतक कैद

अध्यादेशं बलात्कारया घटनाय् मिलापत्र याकीम्हेसित ६ महिनानिसें स्वदँतक कैद वा ३० हजार जरिवाना वा निगुलिं सजाय जुइगु व्यवस्था याःगु दु । मिलापत्र याकीम्ह व्यक्ति सार्वजनिक पद धारण यानातःम्ह जूसा थप ६ महिना कैद जुइ ।

लिपांगु ई पंचायती याइगु व जनप्रतिनिधिया हे संलग्नताय् मिलापत्र याकूगु घटना सार्वजनिक जूगु खः । इमित अपराध कानूनया दायराय् हयेगु प्रष्ट व्यवस्था मजुइधुंकाः अध्यादेश हःगु खः ।

बलात्कारया सजाय नं थप

अध्यादेशपाखें बलात्कारया सजाय तकं थप याःगु दु । आः १४ दँनिसें १६ दँतक व्यक्ति बलात्कारय् १२ निसें १६ दँतक कैद सजाय जुइ । थ्वसिबें न्ह्यः थुज्वःगु अपराधया सजाय १२ निसें १४ तक खः ।

अथेहे, १६ निसें १८ दँया व्यक्त बलात्कारय् १० निसें १४ दँतक कैद सजाय जुइ । थ्वसिबें न्ह्यः थुज्वःगु अपराधय् १० निसें १२ दँतक कैद सजाय जुइगु व्यवस्था दूगु खः ।

१८ दँ वा वसिबें च्वय् व्यक्ति बलात्कारय् १० निसें १२ दँतक कैद सजाय जुइ । थ्वसिबें न्ह्यः थुज्वःगु अपराधय् ७ निसें १० दँतक कैद जुइगु व्यवस्था दूगु खः ।

बलात्कारया घटनाय् दोषी ठहर जूम्ह ज्येष्ठ नागरिकयात कैद छूट यायेगु व्यवस्था चिइकूगु दुसा सुं नं नाबालिग १८ दँसिबें म्हो उमेरया बलात्कार वा बलात्कार कुतः जूगु खः, तर उजुरी लाःगु मदु धाःसा साबालिग जूगु दच्छि दुने उजुरी बिइफइगु व्यवस्था याःगु दु ।

Categorized in दुर्घटना-अपराध