newayatataad 2

बर्दिवासय् निषेधाज्ञा, न्याम्हसिबें अप्वः मनूत मुनेगुलि रोक

नेवा: अनलाइन न्युज – ललेन्द्र शाक्य | २०७७ मङ्सिर १०, बुधबार ११:०७:०६

खुदँ दुम्ह मिसामचाया बलात्कार लिपा हत्या जूगु घटनायात कयाः तनावग्रस्त जूगु बर्दिवासय् स्थानीय प्रशासनं निषेधाज्ञा जारी याःगु दु ।

मंगलवाः जूगु प्रदर्शनया झ्वलय् प्रहरीया गोली कयाः घाःपाः जूम्ह छम्ह युवाया ज्यान वनेधुंकाः स्थिति स्यंकेमबिइत धासें महोत्तरी प्रशासनं बर्दिवास नगरपालिकाय् निषेधाज्ञा जारी याःगु खः ।

थौं बुधवाः सुथय् ९ ता ईनिसें कन्हय् बिहिवाः सुथय् ६ ता ईतकया नितिं निषेधाज्ञा जारी याःगु प्रमुख जिल्ला अधिकारी कृष्णप्रसाद कटुवालं जानकारी ब्यूगु दु ।

बर्दिवास नगरपालिकाया पूर्वय् वडा १ या रातोखोला, पश्चिमय् वडा ५ या माइस्थान, उत्तरय् वडा ३ या गौरीवास पाटु व दक्षिणय् वडा ८ या हात्तीलेट क्वार्टर चोकतक कन्हय् विहिवाm सुथय् ६ ता ईतकया नितिं निषेधाज्ञा जारी जूगु वं धाःगु दु ।

निषेधाज्ञा जारी जूगु क्षेत्रय् न्याम्हसिबें अप्वः मनूत मुने मदइगु धाःगु दु । तर पूर्व पश्चिम राजमार्ग धाःसा सुचारु जुइगु प्रमुख जिल्ला अधिकारी कटुवालं जानकारी ब्यूगु दु ।

बर्दिवास १द्ध या शहील आलमया म्ह्याय् गुलाबया हत्या जूगु खः । आइतवाः सनिलनिसें बेपत्ता जूम्ह मिसामचाया सीम्ह हत्या यानाः बोराय् प्वःचिनाः वांछ्वयातःगु अवस्थाय् सोमवाः बहनी लुयावःगु खः ।

हत्या द्वपनय् अरुणकुमार साहयात गिरफ्तार याःगु दु । बैशाखय् जूगु हत्याय् गिरफ्तारीइ लाम्ह साह नं १ लख धरौटीइ रिहा जूगु छुं दिं दुने हे मिसामचा बलात्कार व हत्या याःगु सिइकेधुंकाः स्थानीय आक्रोशित जुयाच्वंगु दु । इमिसं साहया छेँय् मिँ तकं तयाब्यूगु दु ।

प्रदर्शनया झ्वलय् प्रहरीं गोली चलेयाःबलय् सुं सुं घाःपाः जूगु खः । घाःपाः जूपिंमध्ये बर्दिवास नगरपालिका १ च्वनीम्ह ४० दँया संजय धाइम्ह बुद्धिराज न्यौपाने सीगु खः ।

प्रहरीया गोलीं न्यौपानेया ज्यान वनेधुंकाः स्थानीयपिन्त थप आक्रोशित याःगु दु । गोली चलेयाःम्ह प्रहरीयात कारवाही यायेमाःगु माग यासें इमिसं सुथनिसें हे पूर्व पश्चिम राजमार्ग अवरुद्ध यानाः प्रदर्शन याःगु खः ।

Categorized in दुर्घटना-अपराध