Newa Ekata Diwas Gosthi Adv

बराह अवतारया न्हूगु मतू पुइकाः कन्हेखुन्हु क्वलाल कात्तिप्याखं

नेवा: अनलाइन न्युज – विजयरत्न | २०७७ मङ्सिर १४, आइतबार १५:२६:०७

ललितकला नगरी धकाः धयातःगु यलया मङ्गलय् च्वंगु कात्ति दबुलिइ दँय् दँस कार्तिक महिनाय् क्यनाः वयाच्वंगु कात्ति प्याखनय् नृसिंह अवतार नृत्य मञ्चन यासें म्हिगः शनिवाः थुगुसिइया ‘कात्ति प्याखं’ क्वचायेकूगु दु ।

न्हापा न्हापा लच्छितक नं क्यनीगु कात्तिप्याखं थगुने झीनिन्हु क्यंगु खःसा थुगुसिइ विश्वव्यापी कोरोना महामारीया हुनिं शुक्रवाः व शनिवाः निन्हुजक क्यनाः क्वचायेकूगु खः।
विष्णुपुराणय् आधारित बाखं कथं हिरण्यकश्यपुया वध याइगु लू म्हिगः शनिवाः बहनी क्यंगु खः ।

प्याखं क्वचायेकेगु ज्या नृसिंहया पूजा यासें नृत्य समापन याःगु खः। अथेहे वःगु शुक्रवाः बराह नृत्य प्रदर्शन याःगु खः। कार्तिक नाच संरक्षणया नितिं थुगु दँनिसे अक्षयकोष स्थापना याःगु खः।

शुक्रवाः बहनि जूगु ज्याझ्वलय् यल महानगरपालिका– १६ वडा अध्यक्ष निर्मलरत्न शाक्यं बराहयात मतू(मुकुट) व १० लख तकाया अक्षयकोषया नितिं ग्वाहालि चेक कार्तिक  नाच संरक्षण समितिया नायः किरण चित्रकारयात लःल्हागु खः।

वहे ज्याझ्वलय् १६ वडा अध्यक्ष शाक्यं बराह अवतारया मतू पुलां जुगुलिं न्हूगु मतू लःल्हाःगु खः ।

थुगु ऐतिहासिक नापं साँस्कृतिक सम्पदायात उचित संरक्षण व प्रवद्र्धन यायेत विसं २०७० निसें निन्हु थप यासे झीन्हु व वया लिपा मेगु निन्हु थप यासे झीनिन्हु कात्तिप्याखं क्यनाः वयाच्वंगु खः।

थ्व कात्तिप्याखं मल्लकाल निसें न्ह्यानाः वयाच्वंगु खःसा थुके जुजु श्रीनिवासया काय् योगनरेन्द्र मल्लं ‘उषाहरण’ व ‘माधवानल’ निगू लीला थपे याना कार्तिक ज्वःछि २७ दिं सञ्चालन याःगु खः। उकि १७ विधाया बाखं व नृत्य प्रदर्शन याइगु खः।

थुगुसिइ १८ दँया मस्त व ६० दँया वृद्धपिन्त कोरोनाया अप्वः संक्रमण जुइफुगुलि कलाकारया रुपय् छनोट मयाःगु खःसा शुक्रवाःनिसें न्ह्याःगु कात्तिप्याखनय् बराहयात न्हूगु मतूया नितिं यल महानगरपालिका १६ वडां ग्वाहालि याःगु खः।

थुगुसी कोरोना महामारीया हुनिं दर्शक मतःसे निन्हुजक कात्तिप्याखं क्यनेज्या जुउगु खः।

Categorized in नेवाः