zero media family planning adv

बन्दीपुरयात साहसिक पर्यटकीयस्थल दयेकेगु पहल

नेवा: अनलाइन न्युज – ललेन्द्र शाक्य | २०७७ चैत्र २४, मंगलबार १४:३१:३७

पहाडया लानी नामं म्हस्यूगु तनहुँया बन्दीपुरय् पर्यटन व पूर्वाधारं जाःगु केबुलकार परियोजना निर्माण न्ह्यःने यंकूगु दु । बन्दीपुर केबुलकार एण्ड टुरिजमं न्ह्याकूगु थ्यंमथ्यं २ अर्ब तका दांया लागतया पर्यटकीय अवधारणां गां त्वःता वंपिं फुक्क स्थानीयबासी गां लिहाँ वयेगु व न्हूगु व्यवसायस न्ह्यःने वनेगु क्रम अप्वयाच्वंगु दु ।

बन्दीपुर गाउँपालिकाया सहजीकरणया हुनिं थुगु क्षेत्रय् लगानीया माहोल निर्माण जूगु लगानीकर्तापिन्सं धाःगु दु । बन्दीपुरया मिनी ग्रेटवाल, साइकल लेन, जंगल सफारीया पूर्वाधारय् उगु केबुलकारं थप प्रबर्द्धनया योजना दयेकेधुंकाः उगु क्षेत्र साहसिक पर्यटकीयस्थलया रुपं विकसित जुइगु उगु केबुलकारया नायः रामचन्द्र शर्मां धाःगु दु ।

साहसिकस्थलयात केन्द्रय् तयाः उगु केबुलकारं थः सहायक कम्पनीपाखें तःजाःगु बन्जी जमपया निर्माण प्रक्रिया न्ह्याकूगु दु । अथेहे, जंगल पिंग, १ हजार ८ सय मिटर ताःहाकःगु स्पाइडर जीप लाइन, ६ सय मिटर ताःहाकःगु भीरय् तिंख्यःतक वाक थ्रु, ५० मिटर ताःहाकःगु न्हायकंया तां (पुल)तकं दयेकेगु यानाः डिपिआर तयार याःगु दु ।

अथेहे, स्काई साइक्लिंग लिसेंया मनमोहक मनोरञ्जन पूर्वाधार निर्माण यानाः न्ह्थिं ५ हजारसिबें अप्वः पर्यटक बन्दीपुरय् दुकायेगु आज्जु तःगु दु ।

न्यागू सहायक कम्पनीपाखें थप १ अर्ब तका दां लगानी उगु क्षेत्रय् यायेगु योजना दयेकूगु शर्मां धाःगु दु ।

शर्मां धाःगु दु, हर्स राइडिंग सेवा व छिम्केश्वरीनिसें रामकोटक ४० किमि साइक्लिंग सेवा तकं सुरु यानाः गांगामय् तक पर्यटकीय गतिविधि न्ह्याकेगु योजना दु ।

बन्दीपुरय् निर्माणाधीन केबुलकारया ६५ प्रतिशत ज्या क्वचायेधुंकूगु दु । माथिल्लो स्टेशनय् १५ तल्लाया क्विनटावर निर्माण ज्यायात तकं तीव्रता ब्यूगु दु । क्विनटावरपाखें तब्यागु हुस्सुया समुद्र क्यनेगु लिसें हिमालय दर्शन याकाः बन्दीपुरया सुन्दरता अनुभव याकेगु तयारी दु ।

बन्दीपुरया विकासया नितिं वइगु झिदँया दुने १० लख लगानीकर्तापाखें १० अर्बया लगानी याकाः मंकाः कथं व्यावसायिक अभियान न्ह्याकेगु योजना दयेकूगु दु ।

शर्मां धाःगु दु, बन्दीपुर अवधारणा देस व विदेसय् प्रचारप्रसार यायेगु व देस समृद्ध दयेकेगु कम्पनीया सोच दु ।

आरकेडी समूह अन्तर्गत उगु कम्पनीइ स्वदेस व विदेसया यानाः स्वद्वःम्ह दुजःपिं दु ।

Categorized in स्थानिय-समाज