2565 buddha Jayanti ADV

बजाः भाः थिके जुल, सरकारया मौन समर्थन : महामारीइ लाक्वपाक्व मू, किलोय् १५ तका थिकेजुल

नेवा: अनलाइन न्युज – ललेन्द्र शाक्य | २०७८ बैशाख ३०, बिहिबार १७:२१:३७

कोभिड महामारीं दिक्क ख्यानाच्वंगु इलय् ब्यापारीपिन्सं मखुगु नियत तयाः सर्वसाधारणपिन्त लुटेयानाच्वंगु दु ।

सरकारी निकायं मौन समर्थन प्वंकेधुंकाः सुं सुं व्यापारीपिन्सं खाद्यवस्तुइ लाक्वपाक्व मूल्यवृद्धि यानाः लुटेयानाच्वंगु दु ।

निषेधाज्ञा सुरु जूगु बैशाख १६ गतेनिसें २९ गतेतक नयेगु चिकं, जाकि, मुसुक्येँ व चिनीया भाः किलो व लिटरय् स्वतका निसें झिंन्यातकातक थकाःगु नेपाल खुद्रा व्यापार संघं जानकारी ब्यूगु दु ।

निषेधाज्ञाया १५ न्हुया अवधिइ चिनीइ प्रतिकिलो ११ तका , नयेगु चिकं प्रतिलिटरय् १५ तका, ह्याउँगु मुसुक्येँ प्रतिकिलोय् १३ तका व जाकि प्रतिकिलोय् स्वतका दामं थाहाँ वंगु संघया कार्यसमिति दुजः धु्रव अधिकारीं धाःगु दु ।

निषेधाज्ञाया न्हापांगु दिंतक होलसेलय् ७५ तका प्रतिकिलोय् दूगु चिनीया मू आः ८६ तका प्रीतकिलो थ्यंगु अधिकारीं धाःगु दु । खुद्राय् मिइबलय् आः चिनीया भाः किलोय् ९५ तका थ्यंगु अधिकारीया धापू दु ।

अथेहे, निषेधाज्ञा न्ह्यः प्रतिलिटर २२५ तका दामय् क्वाहाँ वःगु सनफ्लावर नयेगु चिकंया भाः निषेधाज्ञाया हे अवधिइ २४० तका थ्यंगु अधिकारीं धाःगु दु । प्रतिकिलो ११२ तकाय् दइगु मुसुक्येँ ह्याउँगु दालया भाः नं १२० निसें १२५ तका थ्यंकूगु दुसा फुक्क कथंया जाकिया भाः किलोय् स्वतका दां थाहाँ वंगु संघं जानकारी ब्यूगु दु ।

अधिकारीं धाःगु दु, ‘मौज्दात फुइधुंकूगु, आयातय् मछिंगु थें जाःगु हुनि क्यनाः मू थाहाँ वंगु होलसेलं धायेगु याःगु दु, महामारीइ नं लाक्वपाक्व मू थकाल ।’

‘चिनी व चिकंया भाः थाहाँ वंगु खः’

होलसेल खाद्य सामग्री विक्रेतापिनिगु संस्था नेपाल किराना व्यवसायी संघं नं निषेधाज्ञा लिपा चिनी व नयेगु चिकंया भाः थाहाँ वंगु स्वीकार याःगु दु । निषेधाज्ञा सुरु जुइधुंकाः चिनीया भाः ८० निसें ८७ तका प्रतिकिलो होलसेल थ्यंगु संघया नायः देवेन्द्रभक्त श्रेष्ठं धाःगु दु ।

अथेहे, नयेगु चिकंया भाः नं थाहाँ वंगु तर गुलि थाहाँ वन धैगु एकिन मजूगु श्रेष्ठं धाःगु दु । संघया नायः श्रेष्ठं धाःगु दु, ‘चिनीया भाः किलोय् ७ तका थाहाँ वंगु दु, चिकंया भाः नं अथेहे थाहाँ वंगु दु, चिकनय् गुलि थाहाँ वन एकिन धायेमफुत ।

मेमेगु खाध्य हलंज्वलखय् धाःसा मू बृद्धि मजूगु श्रेष्ठया जिकिर दु । महामारीया इलय् व्यवसायीं मजूसे उत्पादक उद्योगी व्यवसायीं हे मू थकाःगु संघया नायः श्रेष्ठया धापू दु । उपभोक्तापिन्सं निषेधाज्ञाय ग्याःचिकुया हुनिं खाद्यवस्तु मौज्दात यायेगु प्रचलन अप्वःबलय् नं मू अप्वः काइपिन्त फाइदा जूगु नायः श्रेष्ठया जिकिर दु ।

मूकदर्शक नियामक निकाय महामारीया दथुइ हे बजारय् मूल्यबृद्धिं उपभोक्ताया छ्यं स्यानाच्वंगु इलय् नियामक निकाय धाःसा ‘म्हुतुइ धौ फिनाः’ मौन जुयाच्वंगु दु । बजार अनुगमनया नामय् छुं चिचीधंगु खुद्रा पसलय् अनुगमन याःगु वाणिज्य, आपूर्ति व उपभोक्ता संरक्षण विभागं मू थकायेत मू भूमिका म्हितीपिन्त धाःसा छुं कारवाही याःगु मदु ।

चिनी लिसेंया खाद्यान्नया मूल्यबृद्धिबारे गुनासो वःगु विभागया निर्देशक व प्रवक्ता शिवराज सेढाईं धाःगु दु । उपलब्ध स्रोत व साधनया आधारय् बजार अनुगमन यानाच्वनागु वया दाबी दु ।

प्रवक्ता सेढाईं नं धाःगु दु, ‘महामारीइ स्वास्थ्य क्षेत्रय् संयुक्तलिसें खाद्यान्नय् नं नियमित अनुगमन यानाच्वनागु दु । आः उकियात थप अप्वयेकेगु जुइ ।’

Categorized in बजाः