नेवा: अनलाइन न्युज – निश्चल | २०८० भाद्र २६, मंगलबार २१:२५:२६

सरकार  पाखें निस्वंगु सहकारी क्षेत्र सुधार सुझाव कार्यदलं समस्याग्रस्त सहकारीया सञ्चालक व कर्मचारीया सम्पत्ति लिसें सहकारीया स्रोत प्रयोग यानाः थीथी व्यक्तिया नामय् तयातःगु सम्पति जफत यानाः निक्षेपकर्ताया निक्षेप लित बिइगु नितिं सिफारिस याःगु दु ।

थौं मंगलवा प्रधानमन्त्री पुष्पकमल दाहाल प्रचण्डयात लः ल्हगु प्रतिवेदनय् उगु सुझाव न्ह्यब्वयातःगु ख ः ।

कार्यदलं समस्याग्रस्त सहकारी संस्थाया नास जुइगु सम्पत्तियात तरलय् रुपान्तरण यानाः स्थानीय तह नाप समन्वय यानाः तत्काल निकास पिकायेत नं सिफारिस याःगु दु । सहकारीका सञ्चालक व कर्मचारीया सम्पत्ति विवरण अभिलेखीकरण यायेत नं सिफारिस याःगु दु ।

अथे हे समस्याग्रस्ततर्फ उन्मुख सहकारी संस्थाया सञ्चालक, पदाधिकारी संलग्न जिम्मेवार कर्मचारीया चलअचल सम्पत्ति रोक्का यायेत, वैदेशिक भ्रमण रोक्का यानाः कारबाही यायेत सिफारिस यानाःगु विभागं पितब्यूगु विज्ञप्तिइ न्ह्यथंनातःगु दु ।

अथे हे प्रारम्भिक समस्या समाधानया नितिं अनुसन्धान व कारबाहीया भाला जिल्ला प्रशासन कार्यालय पाखें यायेत नं कार्यदलं सिफारिस याःगु दु ।

सहकारी संस्थाया निरीक्षण व हिसाब जाँचया नितिं नेपाल राष्ट्रबैंकया समन्वय पुचः बिस्कं दयेकेत नं  सिफारिस यानातःगु दु ।

कार्यदलले बचतकर्ता माग याः कथं बचत २०८० चैत्र मसान्त दुनें  लित बिइमाःगु सिफारिस तकं सहकारी विभागं याःगु दु । स्वलाया दुने फुक्क् सहकारी संस्थाया अनुगमन सम्बन्धित नियामक निकायं यायेत सिफारिस नं याःगु दु । 

Categorized in राष्ट्रिय