zero media family planning adv

बंगलादेशय् छवाःया नितिं लकडाउन घोषणा

नेवा: अनलाइन न्युज – ललेन्द्र शाक्य | २०७७ चैत्र २२, आइतबार १३:४८:२०

कोरोना भाइरसया महामारी नियन्त्रण यायेत धासें बंगलादेशय् छवाःया नितिं लकडाउन घोषणा याःगु दु ।

स्थानीय ईकथं थ्वहे अप्रिल ५ निसें लागू जुइगु कथं सरकारं लकडाउनया घोषणा याःगु अधिकारीपिन्सं धाःगु दु । बंगलादेशया सतक, यातायात व पुलमन्त्री अब्दुल क्वाडरं शनिवाः अनलाइन पत्रकार सम्मेलनपाखें लकडाउन घोषणा यानागु जानकारी ब्यूगु खः ।

लकडाउनया नितिं न्हूगु निर्देशिका सरकारं याकनं हे घोषणा यायेगु सार्वजनिक प्रशासन मन्त्री फहाद हुसेनं धाःगु दु । अत्यावश्यक लिसेंया गुलिखे सेवाः धाःसा लकडाउनया इलय् नं सुचारु जुइगु अधिकारीपिन्सं धाःगु दु ।

बंगलादेशय् आःतक ६ लख ३० हजार २७७ म्ह कोरोना भाइरस संक्रमित जूगु दु । वमध्ये ५ हजार ६८३ म्ह लिपांगु छन्हुं हे संक्रमित जूगु खः । लिपांगु २४ घौ दुने बंगलादेशय् कोरोनाया हुनिं जक ५८ म्ह मनूत सीगु दु । थ्वलिसें बंगलादेशय् कोरोनाया हुनिं सीपिनिगु मुक्कं ल्याः ९ हजार २१३ म्ह थ्यंगु अधिकारीपिन्सं जानकारी ब्यूगु दु  ।

स्वास्थ्य सेवा महानिर्देशनालयं लिपांगु छन्हुं हे २४ हजार ५४८ म्हेसिगु कोरोना परीक्षण याःगु जानकारी ब्यूगु दु ।

Categorized in अन्तर्राष्ट्रिय