Mohanai 2078 KTM

बंगलादेशय् चीधिकःम्ह सा : गिनिज बुक अफ वर्ल्ड रेकर्ड तइगु

२०७८ आषाढ २६, शनिबार ११:१७:२७

बंगलादेशय् आः छम्ह चीधिकःम्ह सा चर्चाय् वयाच्वंगु दु । ‘रानी’ नां बियातःम्ह उम्ह सा आः बंगलादेशया सेलिब्रिटी जुयाच्वंगु दु । मनूत थ्व सा स्वयेत तापाकंनिसें वयेगु जुयाच्वंगु दु ।

२३ महिनाया भुटानी सा ५१ सेन्टिमिटर तःधिकः जूसा २८ किलोयाम्ह खः ।

राष्ट्रव्यापी लकडाउनया ई जूसां नं आःतक उम्ह सा स्वयेत १५ हजारसिबें अप्वः मनूत राजधानी सहर ढाका लिक्क च्वंगु चरीग्रामय् च्वंगु फार्मय् वयेधुंकूगु बीबीसीं जानकारी ब्यूगु दु ।

फार्मया म्यानेजर हसन होवलदार रानी विश्वया हे दकले चीधिकःम्ह सा जूगु दाबी यासें गिनिज बुक अफ वर्ल्ड रेकर्डसया नितिं प्रक्रिया सुरु याःगु दु ।

सा स्वयेत वःम्ह रिना बेगमं धाःगु दु, ‘जिं थःगु जीवनय् थुज्वःम्ह सा गुबलें नं मखंनि । थौं खना ।’

होवलदारं वंगु दँ बंगलादेशया उत्तर पश्चिमी क्षेत्रय् च्वंगु नओगामय् च्वंगु छगू फार्मपाखें उम्ह रानी सा न्यानाहःगु खः । उम्ह सायात न्यासिवनेगुलि समस्या दु व मेमेपिं सा खनाः नं ग्याइगु जूगुलिं शिकोर एग्रो फार्मय् उम्ह सायात ब्यागलं तयातःगु दु ।

सा थुवाः होवलदारं धाःगु दु, ‘थ्वं यक्व नइमखु, न्हिच्छिया दुने निक्वःतक म्हो जक चुं व भुस्सा नइ । वयात पिने वने मंदु । व सुनां वयात थःगु ल्हातय् काल धाःसा लसता पिकाइम्ह सा खः ।’

आः हलिंया दकले चीधिकःम्ह साया कीर्तिमान भारतया मनिक्यम साया नामय् दु । गुम्ह सा ६१.१ सेन्टिमिटर दु ।

होवलदारया कथं गिनिज बुक अफ वर्ल्ड रेकर्डया प्रतिनिधिं थुगु दँ उगु फार्मया भ्रमण याइ व रानीं गिनिज वर्ल्ड रेकर्डया उपाधि त्याकी वा मत्याकी उबले तिनि सीदइ ।