nepal investment baink

फोनिजपाखें मिलन लिम्बूयात महासचिव पदं राजीनामा बिइत निर्देशन

नेवा: अनलाइन न्युज – ललेन्द्र शाक्य | ने.सं. ११४४ चिल्लागा सप्तमी (२०८० चैत्र १९ गते) सोमवाः

नेपाल आदिवासी पत्रकार महासंघ (फोनिज)या महासचिव मिलन लिम्बूयात राष्ट्रिय स्वतन्त्र पार्टीं इलाम २ पाखें उम्मेदवारी दयेकेगु घोषणा यायेधुंकुगु दु । अयसां, मिलन लिम्बुं फोनिजया महासचिव पदपाखें राजीनामा ब्यूगु मदुनि ।

थ्वहे विषयस फोनिजं असन्तुष्टि प्वंकूसें लिम्बूयात पदं राजीनामा बिइत निर्देशन ब्यूगु दु ।

आइतवाः फोनिजया नायः गजुरधन राईया नायःसुइ येँय् च्वंगु आकस्मिक सचिवालय बैठकं उगु निर्णय याःगु सचिव समीर बलामीं सार्वजनिक याःगु विज्ञप्तिइ न्ह्यथनातःगु दु ।

संघीयता विरोधी पार्टीया उम्मेदवार जूगु धासें पहिचानवादीपाखें आलोचन फयाः वयाच्वंम्ह लिम्बूयात महासचिव पदपाखें राजीनामा बिइत निर्देशन ब्यूगु फोनिज सचिवालयं जानकारी ब्यूगु दु ।

राजनीतिक आवद्धता त्याग यानाः स्वतन्त्र उम्मेदवारी घोषणा याःम्ह लिम्बू वधुंकाः रवि लामिछाने नेतृत्वया पार्टीइ दुहाँ वनेधुंकाः फोनिज लिसेंया जनजाति समुदायं लिम्बूप्रति रोष प्रकट यानाः वयाच्वंगु दु ।

आइतवाः येँय् च्वंगु फोनिज सचिवालयया आकस्मिक बैठकं मिलन लिम्बूया थासय् समीर बलामीयात कार्यवाहकया जिम्मेवारी ब्यूगु दु ।

राजनीतिइ पलाः तम्ह व्यक्तिं पत्रकारिताया सांगठनिक पदय् च्वने मज्यूगु नीति अःखः लिम्बू धाःसा महासचिवय् हे दु ।

थ्वसिबें न्ह्यः लिम्बूयात प्रेस सेन्टर नेपालं संगठनविरोधी गतिविधिइ वंगु धासें सचिव पदं बर्खास्त याःगु खः ।

Categorized in राजनीति