nepal investment baink

फेसबुक लाइभय् शिवसेनाया नेताया गोली क्ययेकाः हत्या

नेवा: अनलाइन न्युज – ललेन्द्र शाक्य | ने.सं. ११४४ पोहेलागा चःह्रे

भारतया मुम्बईलय् शिवसेनाया नेता लिसें पूर्व पार्षद अभिषेक घोषालकरया गोली क्ययेकाः हत्या याःगु दु ।

फेसबुक भिडियो लाइभय् खँ ल्हानाच्वंगु इलय् शिवसेना नेपा अभिषेकयात वया हे पासा मोरिसं गोली क्ययेकूगु खः ।

अभिषेकयात गोली क्ययेकेधुंकाः मोरिसं नं थःत गोली क्ययेकाः आत्महत्या याःगु भारतीय मिडियां जानाकरी ब्यूगु दु । अभिषेकयात गोली कःगु भिडियो सामाजिक संजालय् भाइरल जूगु दु ।

भारतीय मिडियाया कथं अभिषेक व मोरिस पासा पासा खः । इपिं दथुइ छुं दिं न्ह्यः विवाद जूगु खः । हत्याया हुनि थःथवय् विवाद हे जुइफूगु अनुमान याःगु दु ।

सामाजिक संजालय् भाइरल जुयाच्वंगु छगू भिडियोय् अभिषेक व ह्याउँगु टिसर्ट फिनातःम्ह मोरिस छगू कोथा दुने नापं खनेदु । इपिं लसतां भिडियो च्याट यानाच्वंगु खनेदु । छुं ई दुने अभिषेक दनेत्यंबलय् वयात गोली कइ । अभिषेक हालाः धेधेचूगु खनेदु । तर गोली चलेयाःम्ह व्यक्रि धाःसा भिडियोय् खनेमदु ।

भारतीय मिडियाया कथं अभिषेकयात वया हे पासा मोरिसं थःगु अफिसय् सःताः गोली क्ययेकूगु खः । वधुंकाः मोरिसं नं थःत गोली क्ययेकाः आत्महत्या याःगु बुखँय् जानकारी ब्यूगु दु ।

अभिषेकयात बोरीवली करुणा अस्पताल थ्यंकूगु व वासः यायेगु झ्वलय् सीगु मिडिया रिपोर्टय् न्ह्यथंगु दु ।

सीम्ह अभिषे क शिवसेनाया उद्धव ठाकरे गुटया पूर्व विधायक विनोद घोषालकरया काय् खः । बोरीवली विधानसभा क्षेत्रय् घोषालकर परिवारया दबदबा दु ।

सीम्ह अभिषेकया कलाः तेजस्विनी आः पार्षद जुयाच्वंगु दु । अभिषेक धाःसा मुम्बईया दहिसर वार्ड ल्याः १ या पूर्व नगरसेवक खः । व मुम्बई बैंकया निर्देशक तकं खः ।

वंगु वाः नं महाराष्ट्रया उल्हासनगरय् शिवसेनाया एकनाथ शिन्दे गुटया नेता महेश गायकवाडयात प्रहरी स्टेशन दुने हे गोली प्रहार जूगु खः ।

अभिषेकया हत्या लिपा शिवसेना (उद्धव ठाकरे गुट)पाखें सरकारया आलोचना याःगु दु । उद्धव गुटया नेता लिसें सांसद संजय राउतं महाराष्ट्रया गृहमन्त्री देवेन्द्र फडनविसया राजीनामा माग याःगु दु ।

Categorized in अन्तर्राष्ट्रिय