२०७६ बैशाख २०, शुक्रबार १०:१०:३२

सन् २०१९ या न्हापांगु त्रैमासिकया रिपोर्ट सार्वजनिक यासें फेसबुकं थःपिनिगु न्हिथं सक्रिय प्रयोगकर्ताया ल्याः २ अर्ब ३८ करोड पुलेधुंकूगु जानकारी ब्यूगु दु ।

फेसबुक प्रयोगकर्ताया ल्याखय् मद्दिक्क जुयाच्वंगु बृद्धिया मेगु छगू न्ह्याइपुगु व अजूचायापुगु पक्षया नं खुलासा आः नकतिनि जक जूगु दु ।

छगू अध्ययन कथं, सन् २०७० तकया दुने फेसबुकय् म्वाःपिं प्रयोगकर्तासिबें सीपि मनूतय्गु फेसबुक अकाउन्टया ल्याः अप्वः जुइ ।

अक्सफोर्ड विश्वविद्यालयया शोधकर्ता कार्ल ओहम्यान व डेभिड वाट्सनं याःगु अध्ययन कथं यदि फेसबुक प्रयोगकर्ताया बृद्धिदर आःया हे अवस्थाय् दःसा थ्व शताब्दीया अन्त्यतकया दुने फेसबुकय् सीपिं मनूतय्गु अकाउन्टया ल्याः ४ अर्ब ९० करोड थ्यनी । फेसबुकया प्रयोगकर्ता बृद्धिया दर आः १३ प्रतिशत जुयाच्वंगु दु ।

शोधकर्तापिनिगु कथं फेसबुक आः मानव इतिहासया हे दकले तःधंगु मानवीय संग्रहालय जूगु दु । गुकी अल्याख मानव व्यवहार व संस्कृतिया भण्डार दुथ्याःगु दु ।

फेसबुकया थुज्वःगु अर्काइभय् नियन्त्रण यायेगु छगू कथं मानव इतिहासयात हे नियन्त्रण यायेगु सरह जुइगु शोधकर्तापिनिगु मत दु ।

विश्वया अर्बौं मनूतय्गु उगु अल्याख तथ्यांकयात फेसबुकथें जाःगु छुं छगू नाफामुखी कम्पनीया जक पहुँच जुइ मज्यूगु व उगु अल्याख डाटाया संरक्षण यायेगु नितिं फेसबुकं विश्वया इतिहासबेत्ता व विज्ञपिन्त आमन्त्रण यायेमाःगु शोधकर्ता वाट्सनं धयादीगु दु ।

लुमंकेबहःजू, सुं नं फेसबुक प्रयोगकर्ताया मृत्यु जूगु जानकारी प्राप्त जुइखतं फेसबुकं उगु अकाउन्टयात संस्मरणात्मक अकाउन्ट अर्थात् लिगेसी अकाउन्टय् परिणत याइ । उकियात मेमोराइज्ड अकाउन्ट नं धाइ ।

फेसबुकया सेटिङ्सय् छगू अप्सन दइ गन लिगेसी अकाउन्ट सेलेक्ट यायेखतं उगु अकाउन्ट मेमोरियलाइज्ड अकाउन्टय् परिणत जुइ ।

एजेन्सी