nepal life 2076 3 18

फुक्क सरकारी अधिकारीपिन्त आममाफी बिइगु तालिवानया घोषणा

नेवा: अनलाइन न्युज – ललेन्द्र शाक्य | २०७८ भाद्र १, मंगलबार १५:२३:२९

तालिवानं फुक्क सरकारी अधिकारीपिन्त आममाफी बिइगु घोषणा याःगु दु । तालिवानं पूर्ण मनोबलया लिसें ज्याय् लिहाँ वयेत फुक्कसित आग्रह नं याःगु दु । मंगलवाः छगू विज्ञप्ति सार्वजनिक यासें तालिवानं थथे धाःगु खः ।

अन्तर्राष्ट्रिय समाचार एजेन्सी एएफपीं तालिवानयात उदृत यासें धाःगु दु, ‘फुक्कसिगु नितिं आममाफीया घोषणा याःगु दु । उकिं छिकपिन्सं थःपिनिगु न्हिथंया ज्या पूर्ण मनोवलया लिसें न्ह्याकेफइ ।’

अफगानिस्तानयात तालिवानं कब्जाय् कायेधुंकाः अफगानिस्तानया मनूतय्के आः ग्याःचिकु व आशंका ब्वलंगु खनेदु । थुज्वःगु अवस्थाय् तालिवानं सरकारी अधिकारीपिन्त आममाफीया घोषणा याःगु खः ।

तालिवानं थ्वसिबें न्ह्यः सरकार व पश्चिमा मुलुकया संस्थाय् ज्या याःपिं अधिकारीपिन्त लक्षित यानाः आक्रमण यायेफूगु आशंका मनूतय्के दूगु खः । तालिवानं अतिकं बर्बर सजाय बिइगु याःगु व युद्ध अपराध याःगु द्वपं फयाः वयाच्वंगु दु । अयसां तालिवानं धाःसा थुकियात अस्वीकार यानाः वयाच्वंगु दु ।

Categorized in अन्तर्राष्ट्रिय