coved ad

फिलिपिन्सं नेपाःयात तयाःवयाच्वंगु यात्रा प्रतिबन्ध चिइकल

नेवा: अनलाइन न्युज – ललेन्द्र शाक्य | २०७८ भाद्र २०, आइतबार ११:२८:३८

कोभिड महमारी नियन्त्रणया नितिं धासें फिलिपिन्सं नेपाःयात तयाःवयाच्वंगु यात्रा प्रतिबन्ध चिइकूगु दु ।

आः कोरोनाविरुद्धया खोपया हुनिं भयावहस्थिति मजुइगु धासें फिलिपिन्सं यात्रा प्रतिबन्ध चिइकूगु खः ।

फिलिपिन्सं सेप्टेम्बर ६ भाद्र २१ गतेनिसें लागू जुइगु कथं नेपाःलिसें भारत, पाकिस्तान, बंगलादेश, श्रीलंका, संयुक्त अबर इमिरेट्स यूएई दुबइ, ओमान, थाइल्याण्ड, मलेसिया व इन्डोनेसियायात तयातःगु यात्रा प्रतिबन्ध चिइकूगु जानकारी ब्यूगु दु । फिलिपिन्सं नेपाःलिसें झिगू एसियाली मुलुकयात वंगु अप्रिलनिसें यात्रा प्रतिबन्ध तःगु खः ।

झिगू एसियाली मुलुकयात यात्रा प्रतिबन्ध चिइकेत अन्तर निकाय कोभिड १९ कार्यदलया सिफारिस फिलिपिन्सया राष्ट्रपति रोड्रिगो डुटेर्तें स्वीकृत याःगु बुखँ एजेन्सी एएफपीं जानकारी ब्यूगु दु ।

अय्सां फिलिपिन्स वइपिं अन्तर्राष्ट्रिय यात्रुपिन्सं प्रवेश, परीक्षण व क्वारेन्टिन सम्बन्धी नियम धाःसा पालना यायेमालीगु राष्ट्रपतिया प्रवक्ता ह्यारी रोकं धाःगु दु । रोकं धाःगु दु, ‘भारत, नेपाः, पाकिस्तान लिसेंया झिगू एसियाली देसं वइपिं अन्तर्राष्ट्रिय यात्रुपिन्सं प्रवेश, परीक्षण व क्वारेन्टिनसम्बन्धी नियमत पालना यायमाः ।’

फिलिपिनी नागरिकया कूटनीतिज्ञ व विदेशी जीवनपासाथें जाःगु विशेष भिषा बहाकपिं बाहेकया प्रतिबन्धित मेमेगु विदेशी मुलुकया पर्यटनकपिन्त अझ नं देस दुने दुहाँ वयेगुलि रोक तयातःगु दु ।

डेल्टा भेरियन्टया स्थानीय संक्रमण फिलिपिन्सया समुदायर ब्वलंगु दु । अन १ हजार ७८९ म्ह मनूतय्के कोभिड १९ या डेल्टा भेरियन्ट संक्रमण पुष्टि जूगु दु । उपिंमध्ये ३३ म्ह मनूत सीधुंकूगु दु ।

दक्षिणपूर्वी एसियाली फिलिपिन्सय् आः अप्वः कोभिड १९ संक्रमणमध्ये डेल्टा भेरियन्ट मू चुनौति खनेदूगु दु । विश्व स्वास्थ्य संगठनं अझ नं डेल्टा भेरियन्टया समुदायस दूग्ु संक्रमणयात पुष्टि यासें धाःगु दु, ‘थ्व आः फिलिपिन्सय् ब्वलनाच्वंगु मू कोभिड १९ या समस्या खः ।’

Categorized in अन्तर्राष्ट्रिय