Arin Enterprises

फिफा विश्वकप फुटबल : जर्मनीयात बुकल जापानं

नेवा: अनलाइन न्युज – ललेन्द्र शाक्य | २०७९ मङ्सिर ८, बिहिबार ११:३५:५५

कतारय् जुयाच्वंगु फिफा विश्वकप फुटबल कासाय् जापानं जर्मनीयात बुकूगु दु ।

कतारया खालिफा अन्तर्राष्ट्रिय स्टेडियमय् म्हिगः बुधवाः जूगु कासाय् जापानं जर्मनीयात २–१ गोलअन्तरं बुकूगु खः ।

कासाय् सुरुं अग्रता धाःसा जर्मनीं काःगु खः । कासाया ३३ औं मिनेटय् इल्के गुन्डोगानं पेनाल्टीपाखें गोल यासें जर्मनीयात १–० या अग्रता ब्यूगु खः ।

जापानी गोलकिपर शुइची गोन्डां जर्मनीया डिफेन्डर डेभिडयात पेनाल्टी लागा दुने फउल यासें ग्वःतुके धुंकाः जर्मनीं पेनाल्टी काःगु खः । गुकी गुन्डोगानं गोल यायेत ताःलाःगु खः ।

अथेहे, कासाया निगूगु हाफय् जापानं उत्कृष्ट पुनरागमन यात । कासाया ७५ औं मिनेटय् स्थापन्न कासाया रुपं मैदानय् दुहाँ वःम्ह जापानया कासामि रित्सु डोनं गोल यासें कासायात १–१ गोलया बराबरीइ हल । मैदान दुहाँ वःगु प्यंगू मिनेटय् हे वं गोल याःगु खः ।

वधुंकाः कासाया ८३ औं मिनेटय् ताकुमा असानों गोल यासें जापानयात २–१ या गोलअन्तरं न्ह्यःने यंकल । थुगु लिच्वःलिसें समूह ई या जापानं स्वंगू ल्याः मुंकूगु दु ।

Categorized in कासा