nepal investment baink

फागुन २५ गते किपुली मोरस ब्याण्डया “महाशिवरात्री विशेष संगीत महोत्सव” जुइगु

नेवा: अनलाइन न्युज – ललेन्द्र शाक्य | ने.सं. ११४४ सिल्लागा अस्तमि (२०८० फागुन २० गते)

किपुली सन् १९९५ स पलिस्था जूगु संगीत क्षेत्रय् निरन्तर रुपं सक्रियता प्वंकाः वयाच्वंगु द मोरस ब्याण्ड किपूया ग्वसालय् थ्वहे वइगु फागुन २५ गते शुक्रवाः “महाशिवरात्री विशेष संगीत महोत्सव” कन्सर्ट ज्याझ्वः जुइगु जानकारी ग्वसाः खलः द मोरस ब्याण्ड किपू नं ब्यूगु दु ।

किपूया १ वडा ऐतिहासिक दरबार लागा लायकुलिइ जुइगु उगु सांगितिक कन्सर्ट ज्याझ्वः सनिलया ४ ता ईनिसें बहनीसिया ८ ता ईतक न्ह्याइगु जानकारी नं ग्वसाः खलकं ब्यूगु दु ।

द मोरस ब्याण्ड किपूसन् १९९५ स सांगितिक लागाय् उत्साही युवापिं राकेश महर्जन, महेशराम महर्जन, राजमान महर्जन, ओमशान्त महर्जन व रामेश्वर महर्जनपिं जानाः नीस्वंगु सांगितिक ब्याण्ड खः । थुगु ब्याण्डय् न्हूपिं थप जूपिं दुजःपिं सौगात व उपेन खः ।

मोरस ब्याण्डं सन् १९९७ स चन्द्रागिरीइ जूगु दक्षिण भेगीय नेपालभाषा म्ये कासाय् उत्कृष्ट संगीत, उत्कृष्ट प्रस्तुति व गायनय् ल्यू यानाः स्वंगू सिरपाः त्याकूगु खः ।

द मोरस ब्याण्ड किपूपाखें सन् २००३ स सम्झना अडियो भिडियोया लुखां ‘को हौ ?’ नांया सोलो म्येचाः पिथनेधुंकूगु दु ।

रक संगीतयात विशेष प्राथमिकता बियाः संगीत क्षेत्रय् निरन्तरता बियाः वयाच्वंगु द मोरस ब्याण्ड किपूप्रति आपालं युवा संगीतह्यःमिपिं प्रभावित जुयाच्वंगु दु । छगू ल्याखं धायेगु खःसा किपुली मोरस ब्याण्ड ‘पिनियर्स अफ रक’या रुपंविकसित याःगु दु धाःसां छुं पाइमखु ।

मोरस ब्याण्डं किपूया स्थानीय संगीतकर्मीपिन्त सांगितिक यात्राय् प्रवद्र्धन यायेगु ज्याय् ज्वःमदूगु योगदान याःगु दुसा स्थानीय संगीतयात नं ह्यूपाः हयेगु ज्याय् न्ह्यचिलाः वयाच्वंगु दु ।

वइगु शिवरात्रीया दिं फागुन २५ गते शुक्रवाः किपूया १ वडा लायकू त्वालय् जुइगु मोरस ब्याण्डया कन्सर्टया आज्जु धैगु भाव, भक्ति व सांगितिक ब्वज्यापाखें स्वकुमिपिन्त स्वच्छ मनोरञ्जन बिइगुपाखे लक्षित यानाः छगू सांगितिक उत्सवया रुपं ज्याझ्वः जुइगु जूगु दु ।

किपूया द मोरस ब्याण्डं संगीतय् सीमाना पार यायेगुलिसें भावना ब्वलंकेगु व प्राणीपिन्त छथाय् मुंकाः भातृत्व कायम यायेगु ज्वःमदुगु क्षमता दु धकाः धासें संगीत छगू विश्वव्यापी भाषा खः, गुकिं आत्मालिसे न्वःवाइ व प्रायः समुदायया संस्कृति,  बाखं व विविधता ब्वलंकेगु न्हायकंया रुपं ज्या याइ धकाः धाःगु दु ।

थ्वहे झ्वलय् झीगु जीवन्त व सांस्कृतिक रुपं समृद्ध समुदायस, द मोरस ब्याण्ड किपू थःगु हे थासय् अविश्वसनीय प्रतिभायात प्रष्फुटन यायेगु नितिं कन्सर्टया ग्वसाः ग्वये दयाः लसता पिज्वःगु धासें मोरस ब्याण्डं फागुन २५ गते शुक्रवाः किपूया १ वडा लायकू त्वालय् जुइत्यंगु ‘महाशिवरात्री विशेष संगीत महोत्सव’य् सहभागिताया नितिं सकल संगीतह्यःमिपिन्त इनाप याःगु दु ।

Categorized in कला