nepal investment baink

फागुन २४ निसें २८ तक नेवाः लहना किपुली थ्वँ–अयलाः नख जुइगु

नेवा: अनलाइन न्युज – ललेन्द्र शाक्य | ने.सं. ११४४ सिल्लाथ्व एकादसी

किपूया अतिकं नांजाःगु सुलिं किपू नगरपालिका १ वडा थांबहाः त्वालय् च्वंगु नेवाः लहनाय् फागुन २४ निसें २८ गतेतक “नेवाः लहना थ्वँ–अयलाः नखः” जुइगु जूगु दु ।

नेवाः लहनाया नायःलिसें नेवाः लहना विश्व सरसफाई अभियानया अभियन्ता राजमान मानवं नेवाः समाजय् थ्वँ–अयलाःया गुलि कथंया प्रकारत दु धैगु दसि क्यनेगु नितिं नेवाः लहना थ्वँ–अयलाः नखः ग्वसाः ग्वयागु जानकारी बियादीगु दु ।

नायः राजमान मानवं नेवाः समाजय् जिचाभाजुयात त्वंकेगु थ्वँ–अयलाः ब्यागलं व्यवस्था यानातइ, भ्वय् नकेबलय् भ्वयया नितिं ब्यागलं हे थ्वँ–अयलाः फ्यानातइगु लिसें थीथी ज्याझ्वःया नितिं थीथी कथं थ्वँ–अयलाः फ्यानातइगुलिं नेवाः समाज दुने थ्वँ–अयलाः आपालं कथंया दूगु खँ कनादिल । नेवाः समाज दुने थुज्वःगु तःताजिया थ्वँ –अयलाः दूगु इतिहास व परम्परायात थौंकन्हय्या न्हूपुस्तायात क्यनेगु नितिं नं नेवाः लहना थ्वँ–अयलाः नखःया ग्वसाः ग्वयागु जानकारी बियादीगु दु ।

भाजु मानवं नेवाः लहना थ्वँ–अयलाः नखः ज्याझ्वलय् थ्वँ–अयलाः जक ब्वज्या मखुसे सकतां नेवाः नसाया परिकारया नं व्यवस्था दइगु जानकारी बियादिसें उगु नखतय् न्ययदँ खुइदँ न्ह्यः स्वनिगःया नेवाःतय्गु स्थिति गथे खः ? उगु इलय् नेवाःतसें गुज्वः गुज्वःगु नसाः ज्वलं नइगु खः ? गुज्वःगु कथंया वसः पुनीगु खः ? उगु ईया संस्कार, परम्परा, रहनसहन गुज्वःगु खः ? थ्व सकतां स्वयेदइगु जानकारी नं बियादीगु दु ।

उगु नेवाः लहना थ्वँ–अयलाः नखःपाखें म्हिगःया नेवाः सभ्यता व नयेत्वने ज्वलंया म्हसीका ब्वयेगु कुतः जुइ व सकारात्मक रुपं म्हिगःनिसें थौंतकया नेवाः म्हसीका छु खः धैगु इतिहास सिइकेफइ धकाः धासें नायः राजमान मानवं फागुन २४ निसें २८ गतेतक न्यान्हुयंकं जुइगु नेवाः लहना थ्वँ–अयलाः नखः ज्याझ्वलय् सहभागिताया नितिं सकलसित इनाप यानादीगु दु ।

Categorized in नेवाः