nepal investment baink

फागुन १ गते विदा बिइगु निर्णय संविधानया मर्म व भावना अःखः – सर्वोच्च

नेवा: अनलाइन न्युज – ललेन्द्र शाक्य | २०८० माघ २३, मंगलबार १३:११:१८

तत्कालीन विद्रोही दल नेकपा माओवादी केन्द्रं झिदँतक न्ह्याकूगु सशस्त्र युद्धया थालनी जूगु दिंया लुमन्तिइ फागुन १ गते सार्वजनिक विदा बिइगु निर्णय संविधानया मर्म व भावना अःखः जूगु सर्वोच्च अदालतं ठहर याःगु दु ।

प्रधानमन्त्री पुष्पकमल दाहाल प्रचण्ड नेतृत्वया सरकारं वंगु दँया फागुनय् थुगु दँनिसें लागू जुइगु कथं फागुन १ गतेयात जनयुद्ध दिवनया सार्वजनिक बिदा बिइगु निर्णय याःगु खः । सरकारया निर्णय विरुद्ध सर्वोच्चय् दायर रिटय् सुनुवाइ यासें सर्वोच्चं सरकारया निर्णय बदर यानाब्यूगु खः । गुकिया पूर्ण पाठ आः नकतिनि जक सार्वजनिक जूगु दु ।

सरकारया उगु निर्णय विरुद्ध ज्ञानेन्द्र राज आरणलिसें निलम देवकोटा, स्वस्तिका अधिकारी, जमुना रोका, सावित्रा शर्मा, जनक कुमारी कोइराला, मैंया भण्डारी लिसेंया पिन्सं दायर याःगु रिटयात कयाः सुनुवाइ यासें सर्वोच्चया न्यायाधीशपिं महेश शर्मा पौडेल व आनन्दमोहन भट्टराईया मंकाः इजलासं जनयुद्धया विदा खारेज यानाब्यूगु दु ।

सार्वजनिक फैसलाया पूर्णपाठय् जनयुद्ध खँग्वः संविधानं मस्यूगु व संविधानया भावना व मर्म अःखः जुइगु न्ह्यथंगु दु ।

फैसलाया पूर्णपाठय् धयातःगु दु, ‘नेपाःया संविधानया प्रस्तावना व धारा ४२ या उपधारा ५ य् ‘जनयुद्ध’ छ्यःगु मखुसे सशस्त्र संघर्ष खँग्वः जक छ्यःगु खनेदु । लिसें गन सशस्त्र धाराय् तकं जनयुद्ध खँग्वः उल्लेख जूगु वा छ्यलाबुला जूगु अवस्था मदु । लिसें गन सशस्त्र संघर्ष खँग्वः छ्यःगु दु, अन द्वन्द्व पीडित, विस्थापित, घाःपाः जूगु आदि खँग्वःत नं छ्यलातःगु दु । थुकिं जनयुद्ध खँग्वःयात संविधानंमान्यता ब्यूगु वा पहिचान याःगु अवस्था खनेमदु । संविधानं मस्यूगु खँग्वःयात संविधान प्रतिकूल निर्णय याःगु धकाः लाःगु थुगु विवादय् संविधानय् प्रयुक्त जूग्ु उगु खँग्वःयात स्वयेमाःगु व वहे आधारय् संविधान सभाया मनसाय पहिचान यायेमालीगु जुइ ।’

नेपाल सरकार व तत्कालीन विद्रोही नेकपा माओवादी दथुइ जूगु विस्तृत शान्ति सम्झौताय् जनयुद्ध धैगु खँग्वः मजूसे सशस्त्र द्वन्द्व छ्यलातःगु, नेपाःया संविधानय् जनआन्दोलन, सशस्त्र संघर्ष छ्यःगु जूसां नं जनयुद्ध खँग्वः छ्यलाबुला मजूगु व संविधान निर्माणया झ्वलय् २०६६ पुस १० गते संवैधानिक समितिइ सहलह जूबलय् जनयुद्ध थप यायेगु धैगु खँग्वः प्रस्ताव बहुमतपाखें अस्वीकृत जूगुलिं नं फागुन १ गते विदा बिइमफइगु फैसलाय् न्ह्यथनातःगु दु ।

संक्रमणकालीन न्यायं पूर्णता मकाःसे उकिं पीडित व्यक्तिपिनिगु पीडाप्रति उपेक्षा भाव क्यंसें इमित थप पीडा जुइगु कथं द्वन्द्वया सुरुवात याइगु सीमित ल्याःया इच्छाया आधारय् संविधान अःखः जुइगु कथं कार्यकारिणी अधिकारया स्वेच्छाचारी रुपं छ्यलाः विदा बिइगु कथं जूगु निर्णयपाखेंपीडितया न्यायया अधिकार व संक्रमणकालीन न्यायया संयन्त्रया ज्या व संक्रमणकालीन न्याययात तार्किक निष्कर्षय् थ्यंकेगु ज्याय् पंगः जूगु पूर्ण पाठय् न्ह्यथनातःगु दु ।

Categorized in राजनीति