Newa Ekata Diwas Gosthi Adv

फागुन दुने कोरोना भाइरसविरुद्धया खोप थ्यनी : स्वास्थ्य मन्त्रालय

नेवा: अनलाइन न्युज – ललेन्द्र शाक्य | २०७७ पौष २८, मंगलबार १५:४०:५८

स्वास्थ्य व जनसंख्या मन्त्रालयया प्रवक्ता डा. जागेश्वर गौतमं कोरोना भाइरसविरुद्धया खोप फागुन महिना दुने वइगु जानकारी ब्यूगु दु । वं खोप हयेगु प्रक्रिया न्ह्यायेधुंकूगु धाःगु दु ।

मन्त्रालयया प्रवक्ता डा. गौतमं धाःगु दु, जिमिसं थ्व दिं खोप हयेगु धकाः किटान यानाः सम्झौता यानागु मदु, तर प्रक्रिया न्ह्यायेधुंकूगु दु । खोप हयेबलय् ७ निसें ८ डिग्रीइ तयेमिलेजूगु, दंगु व डब्ल्यूएचओ नं स्वीकृत ब्यूगु खोप जक हयेगु जुइ ।

प्रवक्ता डा. गौतमं ६० प्रतिशतयात गाइगु कोभ्याक्सपाखें वइगु धासें ल्यंदुपिनिगु नितिं गुगु देसं याकनं व प्रभावकारी रुपं निर्माण याइ उकियात सरकारं दां पुलाः हयेगु व जनतायात निःशुल्क रुपं बिइगु धाःगु दु ।

सरकारया न्हापांगु प्राथमिकता उच्च जोखिमय् दुपिं स्वास्थ्यकःमि, सुरक्षाकःमि लिसेंया अग्रपंक्तिइ दुपिं मनूतय्त, ५५ दँ उमेर च्वय् च्वंपिं व दीर्घरोगीपिनिगु नितिं उपलब्ध याकेगु डा. गौतमया धापू दु ।

प्रवक्ता डा. गौतमं साधारण रुपं खोप निर्माण यायेत १० दँ ई तुइगु जुयाः आः दच्छिया दुने हे तयार जूगु खोप १०० प्रतिशत विश्वास यायेमफइगु धाःगु दु । नीजि क्षेत्रं थःपिन्सं हे खोप हःसां नं न्हापांगु प्राथमिकताय् सरकार जूगुलिं ७० निसें ८० प्रतिशत सरकारयात बुझेयायेमाःगु धाःगु दु ।

संक्रमण दर म्हो जूसां नं संक्रमणया जोखिम म्हो मजुगुलिं फुक्क सचेत जुइत स्वास्थ्य मन्त्रालयया प्रवक्ता डा. गौतमं इनाप याःगु दु ।

Categorized in बजाः