nepal investment baink

फलफुल मीम्ह साइकल व्यापारी प्रहरीया शरणय् ः जाली नोट ब्यापारी ज्वनेगु लँपु

नेवा: अनलाइन न्युज | २०७३ जेठ ११, मंगलबार १६:३४:२२

लागुवासः मुद्दाय् २०५२ सालनिसें २०६७ सालतक येँया सुन्धाराय् च्वंगु केन्द्रीय कारागारय् १५ दँ जेल जीवन बिते यायेधुंकूम्ह वैजनाथ गुप्तानापं नक्कली भारु कारोबारय् दुथ्याःपिं ८ म्हेसित येँया प्रहरीं ज्वंगु दु ।

तःधंगु परिणामया नक्कली भारुलिसें ज्वःपिं मिरा जिरेल, सुमन मल्ल, तारणी प्रसाद ठाकुर, वैजनाथ गुप्ता, विजयराज शर्मा, सनद प्रधान, अमृतमान श्रेष्ठ व पाकिस्तानी नागरिक समा नाज खः ।

भारतीय जाली भारु दां व जाली अमेरिकी डलरलिसें ज्वंपिन्त मंगलवाः सार्वजनिक यासें महानगरीय प्रहरी ज्याकू लानिपुखुलिं इपिंपाखें १९ लख ८७ हजार भारतीय नक्कली दां बरामद याःगु जानकारी ब्यूगु दु ।

अथेहे, त्रिभुवन विमानस्थल क्वाहां वयेखतं ज्वंम्ह पाकिस्तानी नागरिक समा नाजयाके ३६ लख नक्कली भारु व १९,५०० अमेरिकी डलर बरामद याःगु प्रहरीं जानकारी ब्यूगु दु ।

थुकथं पोल खुले जुल

बैशाखया लिपांगु वाःपाखे येँया टिचिङ हस्पिटल न्ह्यःने साइकलय् फलफुल व तरकारी मियाच्वंम्हलिसे दोलखाया मिसा मिरा जिरेल व कपनया सुमन मल्लं छुं भारतीय जाली दां ह्यूगु खः । द्वःछि व न्यासः वंगु उगु भारतीय नोट नक्कली धैगु सीधुंकाः उम्ह साइकल व्यापारी महानगरीय प्रहरी वृत्त महाराजगञ्ज वंगु खः ।

महाराजगञ्ज प्रहरी वृत्तया डिएसपी विश्वमणि पोखरेलया सल्लाह कथं मधेसी मूलया उम्ह ब्यापारीं मिरा व सुमनयात थःम्हं मेगु यक्व भारतीय नोट सटही यायेफूगु जानकारी बिल । वधुंकाः ३२,००० (स्वीनिद्वः) तका नक्कली भारु ज्वनाः टिचिङ थ्यंम्ह मिरा व सुमनयात ज्वनेत महानगरीय प्रहरी वृत्त महाराजगञ्ज ताःलात ।

व धुंकाः मेगु जाली नोट कारोबारीया पोल खोले जुजुं वन । महाराजगञ्ज वृत्तया डिएसपी पोखरेलं धयादी ‘मिरा व सुमनया सुचंया आधारय् जिमिसं बैजनाथ गुप्ता, सनद प्रधान व अमृतमान श्रेष्ठयात ज्वनेत ताःलात ।’

प्रहरीं मिरा जिरेलपाखे २ लख, सुमन मल्लपाखें १,३२०००, बैजनाथ गुप्तापाखें १५००, विजयराज शर्मापाखें ५,८८०००, सनद प्रधानपाखें १० लख व अमृतमान श्रेष्ठपाखें ६५,००० भारु बरामद याःगु प्रहरीं जानकारी ब्यूगु दु ।

विमानस्थल क्वाहाँ वयेखतं नक्कली भारुया सुटकेश नापं झ्याप्प !

थ्वसिबें न्ह्यः निक्वःतक नेपाः वयेधुंकूम्ह पाकिस्तानया समा नाज स्वक्वःगुखुसि त्रिभुवन विमानस्थलपाखें होटलपाखे वनाच्वंगु खः । प्रहरी प्रधान ज्याकू, विशेष ब्युरोया सुचंया आधारय् समायात त्रिभुवन विमानस्थलया गोल्डेन गेट क्रस याये मलावं येँया प्रहरीं ज्वंगु खः ।

जेठ ८ गते ज्वनेधुंकाः मंगलवाः सार्वजनिक याःगु समा नाजया पाखें ३६ लख भारतीय जाली नोट व १९,५०० नक्कली अमेरिकी डलर बरामद याःगु धाःगु दु । प्रहरी प्रधान ज्याकू बिशेष ब्युरोया डिआईजी बमबहादुर भण्डारीया कथं थ्वसिबें न्ह्यः नक्कली अमेरिकी डलर बरामद याःगु खः ।

लखौंया जाली नोटया टार्गेट नेपाली बजार

विशेष ब्युरोया डिआईजी बमबहादुर भण्डारीया कथं थ्वसिबें न्ह्यः नेपाः जुयाः भारतीय बजारय् प्लेसमेन्ट जूगु नक्कली भारु थुगुखुसि नेपाली बजारय् हे प्लेसमेन्ट यायेकथं भारु कारोबारी सक्रिय जूगु खनेदूगु दु ।

थथे नेपाली बजारय् नक्कली भारु प्लेसमेन्टया जिम्मा काःम्ह सुमन मल्ल, मिरा जिरेल व अमृतमान श्रेष्ठं प्लेसमेन्टया तयारी यानाच्वंगु इलय् टिचिङ हस्पिटल न्ह्यःने तरकारी व फलफुल मियाः वयाच्वंम्ह छम्ह व्यापारी प्रहरीया शरणय् थ्यनेधुंकाः कारोबारया संजाल छताछुल्ल जूगु खः ।

पाकिस्तानपाखें नक्कली भारु मगे यानाः येँपाखें वितरण याइम्ह वैजनाथ गुप्ता नेपाली बजारय् हे भारु बिके यायेगु योजनानापं सिरहाया लहान थ्यंगु इलय् प्रहरीं वयात लहानय् ज्वनाः येँय् हःगु खः । प्रहरीया कथं तारणीप्रसाद ठाकुरं नं नेपाली बजारय् भारतीय जाली नोट सटही यायेगु जिम्मा काःगु खः ।

Categorized in दुर्घटना-अपराध