prabhu baink new

प्लेनय् फुक्क सिटय् यात्रु ज्यूसा बसय् छाय् मज्यू ?...यातायात व्यवसायीया न्ह्यसः

नेवा: अनलाइन न्युज – ललेन्द्र शाक्य | २०७७ आश्विन ४, आइतबार १३:२२:३२

यातायात व्यवसायीपिन्सं सार्वजनिक सवारीइ सिट क्षमता कथं हे यात्रु तयेदयेमाःगु माग न्ह्यःने हःगु दु । आन्तरिक सेवाया विमानयात सरकारं पूर्ण क्षमता संचालन याकेत सहमति बिइधुंकाः यातायात व्यवसायीं बसय् नं बच्छि सिट जक यात्रुपिं तयेगु प्रावधान चिइकेत माग याःगु दु ।

नेपाल यातायात व्यवसायी राष्ट्रिय महासंघया महासचिव सरोज सिटौला आन्तरिक वायुसेवा व बसय् पूर्ण क्षमता यात्रु तयेगु दथुइ छुं अन्तर मजूगु धासें मुक्कं बसयात यात्रु तयेदइगु कथं निर्णय जुइमाःगु धाःगु दु ।

सिटौलां धाःगु दु, आन्तरिक हवाई उडानय् यात्रु दथुइ दूरी कायम जुइमखुसा बसय् जक छाय् व नियम मयायेगु ? जिपिं विमानया यात्रु व वायुसेवा संचालकं छुछु मापदण्ड पूवंकी, उकिया पालना यायेत जिपिं नं तयार दु ।

सिटौलां मुक्कं सिट क्षमता यात्रु तयेके ब्यूसा ५० प्रतिशत अप्वः भाडा कायेम्वाःलिगु धाःगु दु । आः बसतसें यात्रु हे मदुगु धासें वं काःसां नं बच्छि जक तयाः वनीबलय् ताःहाकःगु दूरीया सवारीयात संचालन खर्च म्हयेत मुश्किल जुयाच्वंगु दाबी याःगु दु ।

वं धाःगु दु, सरकारं दथु लँपुइ यात्रु तयेमदूगु नियम दयेकी, उकिया कडाई याः । विमानय् नं पीसीआर यानाः च्वनेगु मखुसा भौतिक दूरी पालना बसय् जक लागू जुइमाः धैगु तर्कसंगत मजू ।

व्यवसायीपिन्सं मोहनी लिक्क वःगुलिं बसय् यात्रुया चाप अप्वइगु जूगुलिं आः सरकारं तःगु नियमा पालना यायेत थाकुइगु अवस्था वइगु धाःगु दु । विगतय् नं माहेनीया इलय् यात्रुपिन्सं कोचाकोच यानाः यात्रा याःगु व आः बच्छि जक सिट क्षमता यात्रु ज्वनाः सेवा बिइत बसया ल्याः हे पर्याप्त मजुइगु तर्क इमिगु दु ।

सिटौलां धाःगु दु, सरकारं बसय् विमानय् सिबें चीधंगु लगानी दु धकाः द्वैध कथंया नीति हल धाःसा यात्रु थःहे मर्काय् लाइ । सरकारं याःगु निर्णयबारे महासंघं बैठक सःताः थःपिनिगु धारणा पिने हइ । जिपिं सरकारयात सार्वजनिक यातायातमैत्री नियम दयेकेत क्वात्तुक्वायेगु जुइ ।

Categorized in राजनीति