2565 buddha Jayanti ADV

प्रेमध्वज प्रधान श्रद्धाञ्जलि कलास्टार कभर म्ये कासाया ग्राण्ड फिनाले असार ५ गते

नेवा: अनलाइन न्युज – ललेन्द्र शाक्य | २०७८ जेठ १६, आइतबार १२:१७:००

टप टेन प्लस टु ल्यज्या जुल, कासामिपिनिगु नां जेष्ठया लिपांगु वालय् सार्वजनिक याइगु

मदुम्ह गोल्डेन भ्वाइस अफ नेपाल प्रेमध्वज प्रधान मदुगुलिं वय्कःयात श्रद्धाञ्जलि देछायेगु कथं कलास्टार अनलाइन कभर म्ये कासा न्ह्याकाच्वंगु दु । थुगु कासाय् मुक्कं ८२ म्ह कासामिपिन्सं मदुम्ह प्रधानया म्ये हालाः कासाय् ब्वति काःगु खःसा कासाया टप ३० नं ल्ययाः निगूगु चरणय् थ्यनेधुंकूगु दु ।

अथेहे, आः हाकनं उगु कासाया स्वंगूगु चरण कथं टप टेन प्लस टु कथं झिम्ह व निम्ह कासामिपिं टप ३० पाखें ल्यज्या जुइधुंकूगु दु ।

कासाया कजि बरिष्ठ संगीतकःमि शान्तबहादुर शाक्यं जानकारी बियादी कथं टप टेन प्लस टु ल्यज्यामि प्रतिभापिनिगु दथुइ थ्वहे वइगु असार ५ गते मदुम्ह प्रेमध्वज प्रधानया लत्या (४५ दिं)या पुण्यतिथिस कासाया ग्राण्ड फिनाले जुइगु जानकारी बियादीगु दु ।

कासाया कजि भाजु शाक्यं धयादी, न्हूकथं टप ३० कासामिपिनिगु दथुइ टप १० प्लस २ यानाः झिंनिम्ह (१२ म्ह) कासामिपिन्त फाइनलिष्ट कथं ल्यज्या यानागु दु । टप १० प्लस २ स थ्यनेत ताःलाःपिं प्रतिभापिनिगु नां थ्वहे वइगु जेष्ठया लिपांगु वा सार्वजनिक यायेगु जुइ । थथे टप १० प्लस २ थ्यंकेत ताःलाःपिं कासामिपिनिगु दथुइ मदुम्ह बरिष्ठ संगीतकःमि गोल्डेन भ्वाइस अफ नेपाल प्रेमध्वज प्रधान मदुगु लत्या (४५ दिं)या पुण्यतिथिस येँया बालाजुइ च्वंगु अष्टनारायण हलया दबुली प्रेमध्वज प्रधानया हे म्ये लाईभ हायेकाः ग्राण्ड फिनाले ज्याझ्वः यायेगु जुइसा उगु हे ग्राण्ड फिनालेपाखें सिरपाः त्याकेत ताःलाःपिं प्रतिभापिन्त सिरपाः तकं देछायेगु जुइ ।

थौंकन्हय् कोरोना महामारीं यानाः देसय् लकडाउन जुयाच्वंगु दु । यदि लकडाउनं मपन धाःसा असार ५ गते बालाजुइ च्वंगु अष्टनारायण हलय् तःजिक सांगितिक ज्याझ्वः यासें ग्राण्ड फिनाले यायेगु जुइ धकाः नं ग्वसाः खलकं जानकारी ब्यूगु दु ।

ग्वसाः खलकं उगु ज्याझ्वलय् मन्त्रीलिसें मेयर, पत्रकार, संगीतकःमि नापनापं थीथी हनेबहःपिं व्यक्तित्वपिनिगु उपस्थिति जुइगु जानकारी नं ब्यूगु दु ।

ग्वसाः खलःया कजि शान्तबहादुर शाक्यं बियादीगु जानकारी कथं आः टप १० प्लस २ स छनोटय् लाःपिं १२ म्ह प्रतिभापिन्सं थःपिन्सं चरण १ व २ स हालेधुंकूगु प्रेमध्वज प्रधानया म्ये ग्राण्ड फिनालेया लाईभ ज्याझ्वलय् महाःसे प्रधानया मेगु हे म्ये हालेमाःगु प्रावधान दूगु खँ धयादीगु दु । भाजु शाक्यं धयादी, टप १० प्लस २ स लायेत ताःलाःपिं कासामिपिन्सं आः न्हापांगु चरण व टप ३० स हालेधुनागु म्ये महालेत व प्रधानया मेगु हे म्ये ग्राण्ड फिनाले लाईभ ज्याझ्वलय् हालादीत इनाप यानाच्वना ।

Categorized in कला