nepal investment baink

प्रार्थना म्यें तःभुखायया प्रमाण ल्यंकातइ : सुरेन्द्र तुलाधर

‘यंके जिगु जिन्दगी बरु, यंकेमते थ्व देय् जिगु
न स्वयेफु आः न ख्वयेफु, मन्त मिखाय् ख्वबि जिगु’

तःभुखाय् लिपा प्रार्थना म्ये कथं थौं येँया इतुंबहालय् सार्वजनिक जुइत्यंगु थुगु म्येया च्वमि व निर्देशक सुरेन्द्र तुलाधर खः । वयकलं थ्व म्ये न्हापा कविता कथं च्वयादीगु खःसा इमेज च्यानलय् प्रशारण जुइवं संगीतकार नील शाक्यं कवितायात लय् तयाः म्ये दयेकादीगु खः । थुगु म्ये तःभुखाययात कःघानाः दयेकातःगुलिं नेपालमण्डल राहत अभियानया इनाप कथं प्रार्थना म्ये जुल । अथेहे जुजु वेयर्सपाखें ग्वाहालि चूलायेवं म्युजिक भिडियोया निर्माण नं जूगु दु । नेवाः अनलाइन न्युजं निर्देशक तुलाधरलिसे यानागु बःचाहाकःगु खँल्हाबल्हा थन न्ह्यब्वयाच्वना ।

थुगु प्रार्थना म्ये च्वयेगु बिचाः छितः गनं वःगु खः ?

वंगु वैशाख १२ गते ब्वःगु तःभुखाचं झीगु आपालं सम्पदा ध्वस्त यानाबिल । येँ, यल, ख्वप न्यंकं झी आजुपिंसं दयेकातःगु देगः, सतः दुन । थ्वहे हुनिं जुइमाः जिं दकलय् न्हापां ‘यंकी जिगु जिन्दगी बरु, यंकेमेत थ्व देय् जिगु’ धकाः चिनाखँ च्वयागु । उगु चिनाखँ बांलाः तायेकाः जुइमाः इमेज टेलिभिजनय् प्रशारण जुल । अप्वः धया थें पासापिंसं बांलाः नं तायेकुसेंलि संगीतकार भाजु नील शाक्यं उकियात लसय् हना म्ये चिनादिल । सकसिगुं ग्वाहालिं थुगु म्येया थौं म्युजिक भिडियो नं निर्माण जुल ।



थ्व म्येया विशेषता छु खः ?

न्हापा लिपा जि नेवाः संकिपा निर्माण व निर्देशन यायेगु ज्या यानाच्वनाम्ह खः । थ्व सकसिनं स्यू । उकिं जिं संकिपाया निंतिं म्ये ला च्वया तर थथे कविता हे धकाः नुगलय् थीगु विषययात कयाः च्वयेगु मयाना । तर थौं तःभुखाय् लिपा जिगु मनय् थीगु खँ कविता कथं च्वयागु खः । उकिं थुकिया विशेषता धयागु थ्व म्ये सुनां न्यन, सुनां स्वल वयाके झीगु सम्पदाप्रति अझ अप्वः मतिनाया भाव ब्वलनी । अझ अप्वः झीगु संस्कृति व सम्पदायात ल्यंकेमाः धयागु जागरण वइ । मेता खँ, वि.सं. १९९० सालया तःभुखाय् थें हे थ्व २०७२ साल वैशाख १२ गतेया तःभुखाय् नं आः इतिहासय् ल्यनाच्वनी । उगु इलय् थुगु म्येपाखें झीगु सम्पदा गुलि ध्वस्त जुल थ्व खँया प्रमाण नं थ्व म्येपाखें ल्यंकातयेगु ज्या जुइ । थ्व नं थुकिया हे विशेषता जुइगु जितः ताः ।

थ्व म्येया म्युजिक भिडियोलय् सु सु कलाकारतयसं ब्वति काःगु दु ?

थुकिइ कलाकार जक मखु संस्कृतिविद् शताब्दीपुरुष सत्यमोहन जोशीलिसें नेवाः न्ह्यलुवाः मल्ल के. सुन्दर, सुजीव बज्राचार्य, हनेबहःम्ह च्वमि, निर्देशक व कलाकार रामशेखर नकःमि, उद्योगी–व्यवसायी निरञ्जनरत्न शाक्य, राजेन्द्रमान शाक्य, निर्देशक विजयरत्न असंबरे, फोटोग्राफर राजभाइ सुवाललिसें कलाकारपिं मदनकृष्ण श्रेष्ठ, हरिवंश आचार्य, राजेन्द्र खड्गी, जय श्रेष्ठ, पवन श्रेष्ठ, हिसिला महर्जन, मणिराज लवट, आशिष्मा नकःमि, भिंतुना जोशी, रोजिना सुवाल, भोगेन्द्र मानन्धरपिं दीसा मिस नेपाल इभाना मानन्धर व मिस नेवाः सरिना स्थापितपिंसं नं थुकिइ ब्वति कयादीगु दु ।

थुगु म्येयात विशेष कथं ग्वाहालि यानादीपिं सु सु खः ?

नेपालमण्डल राहत अभियान, जुजु वेयर्सपिनि ग्वाहालिया लिसें थुगु म्येय् सः बियाः ग्वाहालि यानादीपिं मदनकृष्ण श्रेष्ठ, अमरराज शर्मा, सतीश महर्जन, दीपा महर्जन, नील शाक्यपिं खः । अथेहे, प्राविधिक ज्याय् ग्वाहालि यानादीपिं क्यामराम्यान तिलक थापा व वीरेन्द्र भट्ट, सम्पादक सुनीलकृष्ण ताम्राकारपिंतं नं यक्व यक्व सुभाय् बियाच्वना ।

प्रार्थना म्ये सुटिङया किपा ग्यालरी