Header Nepal rastra bank Adv

प्रहरी बुट न्यायेगुलि ६ करोड घोटाला

नेवा: अनलाइन न्युज – ललेन्द्र शाक्य | २०७९ श्रावण १८, बुधबार ११:२३:५३

नेपाल प्रहरीं डिएसएम बुट न्याःबलय् बजाः मूसिबें दोब्बर मू पुलाः न्याःगु सीदूगु दु । कर्न वाल विजनेस ट्रेडर्सया नामय् मोडर्न सूज लिमिटेडपाखें उत्पादित ‘फाइटर सूज’ न्याःबलय् दोब्बर मू तूगु खः ।

ब्यापारी केशर प्रधानया कर्न वा ल विजनेस ट्रेडर्स कम्पनीं २,६५० मूल्यस टेण्डर लाकूगु खः । वहे कथं वया कम्पनीं जिल्ला प्रहरी ज्याकुथिइ छ्वःगु डिएसएम बुट गुणस्तरहीन लाःगु खः । प्रहरी प्रधान ज्याकुथि स्रोतया कथं येँपाखें उगु बुट न्यानाः जिल्ला जिल्लाय् छ्वःगु खः ।

१३ करोड ५० लख तका दां बराबरया डिएसएम बुट न्याःबलय् थ्यंमथ्यं बच्छि रकम घोटाला जूगु अनुमान याःगु दु ।

प्रहरी प्रधान ज्याकुथिं धाःगु दु, ‘आः वःगु बुटया गुणस्तर अतिकं कमजोर जूगु दु । निभाः लखं नइगु कथंया दु । थ्वहे बुट ज्वनाः बजारय् न्याःवनाबलय् १४ सयनिसें १५ सय तका दामं न्यायेगु दु तर नेपाल प्रहरीं थ्व बुटयात २,६५० तका दां पूगु दु । गुकिं यानाः बच्छिसिबें अप्वः रकम अपचलन जूगु सीदु ।’

इमिगु हे मिलेमतोय् लाःगु मेमेगु कम्पनीं २,६७५ व २,७७५ तका दांतःगु खः । आःया ठेक्का धाःसा २,६५० तका दां प्रस्ताव याःगु कम्पनीं काःगु खः । उगु कम्पनीं बुट न्यानाः फुक्क जिल्लाय् छ्वयेधुंकूगु व अनपाखें भुक्तानीतकं कायेधुंकूगु दु । प्रहरीं थुगुखुसि राजनीतिक शक्ति केन्द्रया दबाबय् केन्द्रपाखें हे न्याःगुखः ।

थ्वसिबें न्ह्यः प्रक्रिया जिल्ला जिल्लापाखें हे जुइगु खः । उपेन्द्र कान्त अर्याल प्रहरी महानिरीक्षक जुसांनिसें हे न्यायेगु प्रक्रियायात पारदर्शी यायेत सम्बन्धित ज्याकुथियात भाला बिइगु याःगु खः । तर, आः धाःसा च्वय्पाखें आदेश वःगु धासें प्रहरी प्रधान ज्याकुथिं येँपाखें न्यानाः सम्बन्धित ज्याकुथिइ सामान छ्वयाः भुक्तानी बिइत आदेश ब्यूगु खः । वहे कथं भुक्तानी जुइधुंकूगु दु ।

स्रोतया कथं गुणस्तर परीक्षण तकं मयाःसे १३ करोड ५० लख तका दां बराबरया डिएमएस बुट गुपचुप रुपं न्यानाः वितरण याःगु खः । थथे याःबलय् नेपाल प्रहरीयात ६ करोड तका दांसिबें अप्वः घाटा जूगु स्रोतया दाबी दु ।

–नागरिक न्हिपौपाखें

Categorized in पत्रपत्रिका