newayatataad 2

प्रम ओली संसदीय समितिइ मवन

नेवा: अनलाइन न्युज – ललेन्द्र शाक्य | २०७७ मङ्सिर ११, बिहिबार १६:३६:३१

प्रधानमन्त्री केपी शर्मा ओली संसदीय समितिया बैठकय् अनुपस्थित जूगु दु । ओली थौं बिहिवाःया नितिं सःताःतःगु संघयि संसदया संसदीय सुनुवाई समितिया बैठकय् मवंगु खः ।

समितिं सर्वोच्च अदालतया प्रधानन्यायाधीश, न्यायाधीश, संवैधानिक निकायया प्रमुख वा पदाधिकारी, न्याय परिषदया दुजः व राजदूत पदय् नियुक्ति या सिफारिस याःबलय् अवलम्बन यायेमाmगु समावेशीताया विषयस सहलह यायेत प्रधानमन्त्री ओलीयात बैठकय् सःतूगु खः ।

समितिया सभापति लक्ष्मणलाल कर्णं थौं बिहिवाःया बैठकय् अनुपस्थित जूगुलिं प्रधानमन्त्रीयात हाकनंं सःतेगु निर्णय जूगु जानकारी ब्यूगु दु । वया कथं गुबले सःतेगु धैगु तिथि धाःसा क्वःछ्यूगु मदुनि ।

संविधानिक निकाययात पूर्णता ब्यु

समितिं सरकारयात अविलम्ब संवैधानिक आयोग प्रमुख व पदाधिकारी नियुक्त यायेत निर्देशन ब्युगु दु । संवैधानिक अंग खाली जूगु दुर्भाग्यपूर्ण धासें समितिं थुज्वःगु निर्देशन ब्युगु खः ।

राष्ट्रिय मानवअधिकार आयोग, राष्ट्रिय महिला आयोग लिसेंया आयोगत पदाधिकारीविहीन दुसा अख्तियार दुरुपयोग अनुसन्धान आयोग, निर्वाचन आयोग इत्यादीइ पूर्ण पदाधिकारी मदु ।

समितिया बैठकय् उपस्थित परराष्ट्र मन्त्री प्रदीपकुमार ज्ञवालीं संवैधानिक परिषदया बैठक च्वनेत बहुमत मगाःबलय् नियुक्तिइ लिपा लाःगु धाःगु दु ।

समितिया सभापति कर्णं धाःसा बहुमत खाइगु वा मखाइगु विषयस व्यवस्थापिकाया मजुसे कार्यपालिकाया हे जूगु धाःगु दु ।

ब्यागलं समावेशी ऐन दयेकेत निर्देशन

संसदीय सुनुवाई समितिं संविधानं परिकल्पना याःगु समानुपातिक समावेशीयात व्यवहारय् कार्यान्वयन यायेत सरकारयात ब्यागलं ऐन दयेकेत निर्देशन ब्यूगु दु ।

नेपाल कम्युनिष्ट पार्टी (नेकपा)या सांसद देव गुरुंग, नेपाली कांग्रेसया सांसद जितेन्द्रनारायण देव लिसेंयापिन्सं ब्यागलं कानून मदुबलय् समावेशीता कार्यान्वयन ध्याकुनय् लाःगु धारणा प्वंकूगु दु ।

बैठकय् न्वःवासें सांसद गुरुंगं धाःगु दु, कानूनया अभावय् छम्ह निम्ह जक तःसां नं समावेशी जुल धकाः ब्याख्या जुयाच्वंगु दु ।

Categorized in राजनीति