zero media family planning adv

प्रम ओलीया रणनीति : डा. खतिवडापाखें हे अर्थमन्त्री चलेयायेगु !

नेवा: अनलाइन न्युज – ललेन्द्र शाक्य | २०७७ भाद्र ३१, बुधबार ११:५८:२५

प्रधानमन्त्री केपी शर्मा ओलीं निवर्तमान अर्थमन्त्री डा. युवराज खतिवडायात थःगु विशेष आर्थिक सल्लाहकार नियुक्त याःगु दु । मन्त्रीया हे सेवा सुविधा व स्तरय् च्वनेदइगु कथं खतिवडायात सोमवाः च्वंगु मन्त्रिपरिषद् बैठकं नियुक्त याःगु खः । थ्वलिसें ओलीं अर्थमन्त्रालय खतिवडायात हे चलेयाकेगु रणनीति काःगु अझ स्पष्ट जूगु दु ।

नेकपा दुने अर्थमन्त्री जुइत यक्वसिगु दौडधुप दु । पार्टीया न्वकू बामदेम गौतम, मूछ्याञ्जे विष्णु पौडेल, स्थायी कमिटी दुजः सुरेन्द्र पाण्डे लिसेंया नेतापिं ब्वां जुयाच्वंगु दु अर्थमन्त्री नयेत । तर, खतिवडाया सल्लाहकार नियुक्तिं इपिं अझ झसंग वंगु दु ।

खतिवडायात अतिकं विश्वा याःगु व वहे पाखें ओलीं थःगु आर्थिक ऐजेण्डा लागू यानाः वयाच्वंगु खः । थुकियात निरन्तरता बिइगु रणनीति कःघाःगु दु  प्रम ओलीं ।

आः अर्थमन्त्री ओलीं थःनापं तयेगु व सुंयात राज्यमन्त्री नियुक्त यानाः खतिवडापाखें चलेयायेफइगु सम्भावना अप्वःगु दु । राज्यमन्त्रीया नितिं सुं सुं नां चर्चाय् मदुगु मखु । उपिं ओलीया जक मखुसे खतिवडालिसे नं लिक्क लाःपिं जुइफु ।

खतिवडा विशेष आर्थिक सल्लाहकार नियुक्त जुइखतं बामदेवया अर्थमन्त्री जुइगु सम्भावना नं थ्यंमथ्यं क्वचाःगु दु । आः वया ध्यान मेमेगु मन्त्रालयस वनेधुंकूगु दु ।

Categorized in राजनीति