nepal investment baink

प्रधानमन्त्री प्रचण्डया ध्यान मन्त्रिपरिषद् पुनर्गठनय्, ओलीलिसे थौं मंगलवाः हे सहलह ब्याकीगु

नेवा: अनलाइन न्युज – ललेन्द्र शाक्य | नेपाल संवत ११४४ तछलाथ्व पंचमी (२०८१ जेष्ठ २९ गते) मंगलवाः

प्रधानमन्त्री पुष्पकमल दाहाल प्रचण्डं मन्त्रिपरिषद् पुनर्गठन यायेगु तयारी न्ह्याकूगु दु ।

भारतीय प्रधानमन्त्री नरेन्द्र मोदीया सपथ ग्रहणय् भारत वनेन्ह्यः हे प्रचण्डं मन्त्रिपरिषद् पुनर्गठन याये चाहेजूगु खः । तर, भारत वनेमाःगुलिं उगु ज्या थाँती तःगु खः । प्रधानमन्त्री प्रचण्ड सोमवाः स्वदेश लिहाँ वयेधुंकूगु दु ।

प्रधानमन्त्री प्रचण्डं नागरिक उन्मुक्ति पार्टी, जनमत पार्टी व जनता समाजवादी पार्टीयात कःघानाः मन्त्रिपरिषद् पुनर्गठन याये चाहेजूगु दु ।

नाउपापाखें नायः रंजिता श्रेष्ठ हे मन्त्री जुइगु जूगु दु । वं थःहे सरकारय् सहभागी जुइत्यनागु जानकारी ब्यूगु दु ।

मन्त्रिपरिषद् पुनर्गठन याइबलय् प्रधानमन्त्री प्रचण्डं थःगु दल नेकपा माओवादी केन्द्रपाखें सरकारय् सहभागी मन्त्रीपिन्त लितसतेगु तयारी याःगु दु ।

अर्थमन्त्री वर्षमान पुनबाहेक फुक्क मन्त्रीपिन्त लितसःताः पार्टीपाखें न्हूगु सेट हयेगु प्रधानमन्त्री प्रचण्डया इच्छा दु । थुगुखुसि माओवादीपाखें माधव सापकोटा, राजन दाहाल, महेन्द्र बहादुर शाही लिसेंया नां मन्त्री जुइगु चर्चाय् दु ।

मन्त्रिपरिषद् पुनर्गठनय् एमाले नायः केपी शर्मा ओलीलिसे नं सहलह ब्याकूम्ह प्रधानमन्त्री प्रचण्डं थौं मंगलवाः या कन्हय् बुधवाः दुने निर्णायक सहलह याइगु जूगु दु ।

मन्त्रिपरिषद् पुनर्गठनय् केपी शर्माओलीया असहमति दूगु सीदूगु दु । तत्काल मन्त्रिपरिषद् हिलाबुला यायेबलय् बांमलाःगु सन्देश वनीगु धासें ओलीं छुं ई पिइत धाःगु दु ।

Categorized in राजनीति