nepal investment baink

प्रधानमन्त्री प्रचण्डयात शंखधर दिवसया दिं सुभाय् देछाइगु

नेवा: अनलाइन न्युज – ललेन्द्र शाक्य | २०८० मङ्सिर ४, सोमबार १५:०८:३७

प्रधानमन्त्री पुष्पकमल दाहाल प्रचण्डयात कछलाथ्व दसमी मंसीर ६ गते बुधवाः न्हिनसिया १२ः३० ता इलय् येँया प्रज्ञाभवनय् तःजिक सुभाय् देछाइगु जूगु दु ।

नेपाल संवत न्हूदँ राष्ट्रिय समारोह समिति, नेवाः देय् दबूलिसें थीथी खलः पुचःपाखें मंकाः कथं थथे सुभाय् देछायेगु ज्याझ्वः यायेत्यंगु खः ।

थुगु ज्याझ्वः ताःलाकेगु नितिं थौं सोमवाः न्हिनय् प्यता इलय् येँया ज्याथाय् च्वंगु छुस्याबहालय् थीथी खलः पुचःया मंकाः मुँज्या च्वनेत्यंगु दु ।

समारोह समितिं नेपाल सरकारं वंगु कार्तिक २७ गते मन्त्रिपरिषदया बैठकं नेपाल संवतयात सरकारी दस्ताबेजय् छ्यलेगु निर्णय याःगु लसताय् प्रधानमन्त्री प्रचण्डयात थथे सुभाय् देछायेगु ज्याझ्वः तःगु खः ।

अथेहे, उगु ज्याझ्वलय् नेपाल सरकारपाखें मान्यता बिइगु कथं शंखधर दिवसया लसताय् माल्यार्पण ज्याझ्वः नं तःगु दु ।

नेपाःया म्हसीका नेपाल संवतयात सरकारं निर्णय याःकथं सरकारी दस्तावेजय् छ्ययेकेगु नितिं अथेहे, पहिचानया आन्दोलनं याःगु थीथी माग पूवंकेगु नितिं दबाबमूलक ज्याझ्वः कथं नं थथे सुभाय् देछायेगु ज्याझ्वः यायेत्यनागु खँ मू ग्वसाः खलः न्हूदँ समारोह समितिं धाःगु दु ।

समारोह समितिं उगु ज्याझ्वलय् प्रधानमन्त्री प्रचण्डलिसें थीथी पार्टीया नेवाः नेतापिन्त विशेष पाहाँकथं ब्वनातःगु दु । समितिं ब्यूगु जानकारी कथं प्रधानमन्त्रीपाखें उगु ज्याझ्वलय् विशेष सम्बोधन यायेत्यंगु खँ धाःगु दु ।

Categorized in राष्ट्रिय