नेवा: अनलाइन न्युज | २०८० आश्विन २, मंगलबार १४:५८:२१

नेपाली कांग्रेसया नेता व सांसद प्रकाशमान सिंहं गठबन्धन जूगुईया सहमतियात फुक्कस्यां कार्यान्वयन यानाः वनेमाःगुलि बः ब्यूगु दु ।

नेता सिंहं सहमति पालना याःसा जक देय् अस्थिरतापाखें बचेजुइगु धारणा तःगु दु ।

थौं मंगलवाः येँया शोभाभगवतीइ गणेशमान सिंहया ६२ क्वःगु स्मृति दिवसया लसताय् सिंहया झ्वाताय् स्वाँमाः क्वखायेकूसें नेता प्रकाशमान सिंहं थथे धाःगु खः ।

नेता सिंहं सरकार नीस्वंगु इलय् जूगु दलत दथुया समझदारीयात हे फुक्क दलं कार्यान्वयन यानाः वंसा पायछि जुइगु धाःगु दु । नेता सिंहं संविधानया भावना व मर्म कथं गुलि फु उलि याकनं स्वंगू तहया सरकारयात बिइमाःगु अधिकार बियाः बांलाक्क ज्या यायेमाःगु धाःगु दु ।

उगु ज्याझ्वलय् प्रकाशमान सिंहं गणेशमान सिंहं म्हितूगु भूमिकाया स्मरण याकूगु खः । वं गणेशमानं १५ दँसिबें अप्वः जेल जीवनया ई फुकूगु नं स्मरण याकूगु खः ।

मेगु १५ दँ निर्वासित जीवन फुकूगु धासें गणेशमानपाखें सकस्यां सयेके सिइकेमाःगु प्रकाशमान सिंहया धापू खः । वं गणेशमानं नेपाली समाजयात आदर्शवान दयेकेत तःधंगु योगदान ब्यूगु नं धाःगु दु ।

Categorized in राजनीति