coved ad

प्रधानमन्त्री देउवा नं आइसोलेसनय्

नेवा: अनलाइन न्युज – ललेन्द्र शाक्य | २०७८ पौष २५, आइतबार ११:२०:४०

कन्ट्याक्ट ट्रेसिङय् लायेधुंकाः प्रधानमन्त्री शेरबहादुर देउवा आइसोलेसनय् च्वंगु दु ।

नेकपा माओवादी केन्द्रया नायः पुष्पकमल दाहाल प्रचण्ड, नेता नारायणकाजी श्रेष्ठ लिसेंया नेतापिन्त कोरोना संक्रमण पुष्टि जुइधुंकाः प्रधानमन्त्री देउवा कन्ट्याक्ट टे«सिङय् लाःगु खः । उकिं प्रधानमन्त्री देउवा शनिवाःनिसें हे आइसोलेसनय् च्वंगु प्रधानमन्त्रीया सचिवालयं जानकारी ब्यूगु दु ।

सचिवालयया छम्ह दुजलं धाःगु दु, ‘प्रधानमन्त्री नापलाये ज्इा बन्द यानाः आइसोलेट जुयादीगु दु ।’

अयसां देउवायाके कोभिडलिसे पायछिगु छुं नं लक्षण खनेमदूगु सचिवालय दुजलं धाःगु दु । उकिं कोभिड परीक्षण यायेगु कि मयायेगु धैगु नं एकिन जूगु मदुनि । उम्ह दुजलं धाःगु दु, ‘आः हे पीसीआर टेष्ट यायेगु कि छन्हु निन्हु पियाः परीक्षण याकेगु धैगु अझ नं एकिन जूगु मदुनि, परामर्श जुयाच्वंगु दु ।’

शुक्रवाः सत्ता गठबन्धन दलया शीर्ष नेतापिंलिसें उच्चस्तरीय समन्वय समितिया बैठकय् प्रधानमन्त्री देउवा सहभागी जूगु खः । उकिया कन्हय् कुन्हु शनिवाः माओवादी केन्द्रया नायः प्रचण्ड, नेता नारायणकाजी श्रेष्ठ लिसेंया नेतापिन्त कोभिड पुष्टि जूगु खः ।

शनिवाः हे एमाले नायः केपी शर्मा ओलीलिसे नापलानाः लिहाँ वये खतं प्रचण्ड संक्रमित जूगु खबर वयेधुंकाः देउवा आइसोलेसनय् च्वंगु खः ।

Categorized in राजनीति