prabhu baink new

प्रधानमन्त्री ओली मन्त्रिमण्डल सेट हे हिलेगु तयारीइ

नेवा: अनलाइन न्युज – ललेन्द्र शाक्य | २०७७ भाद्र १०, बुधबार १५:४८:१४

प्रधानमन्त्री केपी शर्मा ओली मन्त्रिमण्डलय् मुक्कं सेट हे हिलेगु तयारीइ ब्वां जूगु दु । ओलीं विश्वासपात्रपिं लिसेया सहलहस मन्त्रिमण्डलय् न्हूगु ख्वाः हयेगु धाःगु सीदूगु दु ।

प्रम ओलीं आः थः मुक्कं न्हूगु ढंगं न्ह्यःने वनेगु धासें मन्त्रिमण्डलय् हिलाबुला मजूसे सेट हे हिलेगु बारे परामर्श न्ह्याकूगु दु । वं सल्लाहकार पुचः तकं हिलेगु संकेत याःगु विश्वस्त स्रोतं जानकारी ब्यूगु दु ।

सरकारय् दुपिं मन्त्रीपिं विवादय् लायेधुंकाः ओलीं मुक्कं सेट हे हिलेगु तयारी न्ह्याकूगु खः । ओलीं थुगुखुसि नेपाल कम्युनिष्ट पार्टीया मेम्ह नायः पुष्पकमल दाहाल प्रचण्ड, वरिष्ठ नेतापिं माधवकुमार नेपाल व झलनाथ खनाल लिसें न्वकू बामदेव गौतमयात तकं चित्त बुझेजुइगु कथं मन्त्रिमण्डलय् न्हूपिं मन्त्रीपिं हयेत सहलह ब्याकाः वयाच्वंगु दु ।

थुगुखुसि उपप्रधानमन्त्री तकं जुयाच्वंम्ह रक्षामन्त्री ईश्वर पोखरेल विवादय् लाःगुलिं मन्त्रिमण्डल पुनर्गठनय् मलाइगु निश्चित प्रायः जूगु दु ।

परराष्ट्रमन्त्री प्रदीप ज्ञवाली तकं दोहोरे मजुइगु जूगु दु ।

गृहमन्त्री रामबहादुर थापा बादलयात नं निरन्तरता मबिइगु ओलीया तयारी दूगु विश्वस्त स्रोतं जानकारी ब्यूगु दु । अर्थमन्त्री डा. युवराज खतिवडा नं दोहोरे मजुइगु जूगु दु । वयात सांसद मनोनित मयाइगु जुइधुंकाः स्वतः पदमुक्त जुइगु जूगु दु ।

छम्ह निम्ह मन्त्रीपिं कार्यक्षमताया आधारय् दोहोरे जुइगु सम्भावना दुसां नं मुक्कं सेट हिलेफूगु जूगुलिं मलायेफु ।

नायः प्रचण्डं नं मुक्कं सेट हिलेगुलि बः ब्यूगु सीदूगु दु ।

बरिष्ठ नेतापिं माधव नेपाल व झलनाथ खनालया चाहना नं वहे खनेदु । थुगुखुसि कानूनी अड्चन मजूसा बामदेव गौतम उपप्रधानमन्त्रीलिसें महत्वं जाःगु मन्त्रालयस थ्यनीगु सम्भावना दु ।
नारायणकाजी श्रेष्ठ नं उपप्रधानमन्त्री लिसें महत्वं जाःगु मन्त्रालय दुने दुहाँ वनीगु सम्भावना आपालं दु ।

Categorized in राजनीति