1142 nhoo dan adv

प्रधानमन्त्रीया अहंकारं लोकतन्त्र हे खतराय् : देउवा

नेपाली कांग्रेसया सभापति शेरबहादुर देउवां प्रतिनिधिसभा विघटनं मुलुकय् लोकतन्त्रयात हे खतराय् लाकूगु धासें थुकियाविरुद्ध संघर्षय् क्वाहाँ वयेमाःगु धाःगु दु ।

बिहिवाः विपक्षी दलं याःगु पत्रकार सम्मेलनय् देउवां थःम्हं १४९ म्ह सांसदया ल्हाःचिं लिसेंया प्रधानमन्त्री पदय् यानागु दाबीयात राष्ट्रपतिं अस्वीकार यानाः लोकतान्त्रिक मूल्य मान्यतायात हे प्रहार याःगु धाःगु दु ।

प्रधानमन्त्री शासकीय अहंकार व स्वेच्छाचारी निर्णयया हुनिं संविधान हे संकटय् लाःगु धासें देउवां अध्यादेशपाखें शासन चलेयायेगु, न्यायालय, संवैधानिक निकाय व राज्य संयन्त्रयात नियन्त्रणय् कायेगु प्रवृत्ति प्रधानमन्त्री केपी शर्मा ओलीयाके खनेदूगु धाःगु दु ।

देउवां धाःगु दु, ‘कोरोना महामारीपाखें जनतायात सुरक्षित यायेगु नितिं जिम्मेवारपूर्ण पलाः छिइमाःगुलि न्हापांगु खोप कायेधुंकूपिं मनूतय्गु निक्वःगु खोप कायेमखनीगु स्थिति ब्वलंकीगु, खुसिबाः चलः व डुबानथें जाःगु प्राकृतिक विपत्तिपाखें जनधनया सुरक्षाया नितिं छुं पूर्वतयारी मयायेगुथें जाःगु गैरजिम्मेवार ज्या प्रधानमन्त्रीपाखें जूगु दु ।’

प्रधानमन्त्रीं ब्वलंकूगु हाथ्या पार यायेत थःपिं संघर्षय् दूगु धासें देउवां माःसा जनपरिचालन तकं यायेगु धाःगु दु ।