nepal life 2076 3 18

प्रधानन्यायाधीश जबरालिसे इजलासय् मच्वनेत न्यायाधीशपिं एकमत

नेवा: अनलाइन न्युज – ललेन्द्र शाक्य | २०७८ मङ्सिर ९, बिहिबार ११:२५:२७

गोलाप्रथापाखें पेशी व्यवस्थापन जुइधुंकाः प्रधानन्यायाधीश चोलेन्द्र शमशेर जबरा दुथ्याःगु इजलासय् सामेल मजुइगुलि सर्वोच्च अदालतया न्यायाधीशपिं एकमत जूगु दु ।

बुधवाः प्रधानन्यायाधीश जबरा बाहेक सर्वोच्च अदालतय् च्वंगु १८ म्ह न्यायाधीशपिनिगु बैठकं गोलाप्रथा सुरु जुइधुंकाः तकं प्रधानन्यायाधीश दुथ्याःगु इजलासय् सामेल जुयाः सुनुवाइ यायेत असम्भव जुइगुलि फुक्क न्यायाधीश एकमत जूगु खः ।

सर्वोच्च अदालतया छम्ह न्यायाधीशं धाःगु दु, ‘जिपिंपाखें थुलि अप्वः संगिन द्वपंत न्ह्यब्वःगु दु व आः वयात जिमिसं लित कयागु अवस्था तकं मदु । थःपिन्सं हे उलि गम्भीर द्वपं बियाम्ह व्यक्तिलिसे इजलासय् च्वनाः न्याय सम्पादन यायेफइमखु धैगुलि जिपिं एकमत दु ।’

वं बिहिवाः नेपाल बार एसोसिएसन व सर्वोच्च अदालत बार एसोसिएसनया सीमित पदाधिकारीपिंलिसे १८ म्हेस्यां सहला यायेगु गोलाप्रथाबारे सहलह यायेगु समझदारी जूगु जानकारी ब्यूगु दु ।

कानून व्यवसायीपिंलिसेया सहलह लिपा न्यायाधीशपिन्सं बिहिवाःया नितिं हे पूर्ण बैठक तय याःगु दु । थ्वसिबें न्ह्यःया हे शैलीइ प्रधानन्यायाधीश चोलेन्द्र शमशेर जबरा बाहेकया पूर्ण बैठकं गोलाप्रथापाखें इजलास क्वःछीगु प्रणाली लागू जुइगु तिथि निर्णय याइ । उकिया नितिं मंसीर १५ गते वइगु बुधवाःया तिथिबारे मोटामोटी सहमति जूगु उम्ह न्यायाधीशं धाःगु दु ।

प्रधानन्यायाधीशयात मेपिं न्यायाधीशपिन्सं अस्वीकार याःगुलिं अझ नं छुं महिना संवैधानिक इजलास धाःसा च्वने मफइगु खनेदूगु दु ।

Categorized in राजनीति