1142 nhoo dan adv

प्रदेशस्तर व स्थानीय रुटय् संचालित बसं थः यत्थे थकाल भाडा

नेवा: अनलाइन न्युज – ललेन्द्र शाक्य | २०७८ श्रावण ४, सोमबार १२:१८:०७

स्वनिगलय् संचालित चीहाकःगु रुटय् सवारीसाधनं सरकारं निर्धारण हे मयाःगु भाडा थः यत्थे थकयाः भाडा कायेगु ज्या न्ह्याकूगु दु । 

संघीय सरकारं राष्ट्रियस्तरय् अन्तरप्रदेश चलेजुइगु सवारीया २८ प्रतिशततक भाडा थकाःगु जूसां नं गुलिखे स्वनिगः दुने हे बस चलेजुइगु यातायात कम्पनीं भाडा थकाःगु खः ।

राजधानीसिबें पिनेया आपालं रुटय् थथेहे थः यत्थे भाडा थकाःगु दु । यातायात व्यवस्था विभागं ताःहाकःगु दूरीइ जक भाडा थकाःगु व स्थानीय व प्रादेशिक स्तरया रुटय् सम्बन्धित स्थानीय तह व प्रदेशं हे भाडा थकायेफूगु धयाः वयाच्वंगु दु । तर, आःतक छुं नं प्रदेश व स्थानीइ तहलं भाडा वृद्धिया निर्णय काःगु मदुनि ।

तर, राजधानी दुने हे चलेजुइगु सवारीतसें २८ प्रतिशततक भाडा थकयाः कायेगु यानाहःगु दु । बसय् थकाःगु भाडादर तिकाः भाडा कायेगु यानाहःगु दु ।

गुलिखे कम्पनीं न्युनतम १४ तका दां जुयाच्वंगु भाडा आः १८ तका थ्यंकूगु दु । वसिबें ताःहाकःगु स्थानीय रुटय् नं २८ प्रतिशया दरं भाडा थकयाः बसय् हे न्हूगु भाडादरया सुचं तिकूगु दु ।

प्रदेश व स्थानीय तहलं अझ नं न्हूगु भाडादर क्वःमछ्यूनिगुलिं थथे भाडा थकाःगु अवैध जूगु यातायात व्यवस्था विभागं जानकारी ब्यूगु दु ।

यातायात व्यवस्था विभागं थःम्हं याःगु भाडा समायोजनयात हे आधार मानेयानाः प्रादेशिक यातायात अन्तर्गत छगू हे प्रदेश दुने संचालन जुइगु वा स्थानीय तहदुनेया रुटय् संचालन जुइगु सार्वजनिक सवारीतसें तकं वहे कथं भाडा वृद्धि याःगुप्रति गम्भीर ध्यानाकर्षण जूगु विज्ञप्तिपाखें हे जानकारी ब्यूगु दु ।

विभागं जारी याःगु विज्ञप्तिइ धयातःगु दु, ‘प्रादेशिक सार्वजनिक यातायातया हकय् सम्बन्धित प्रदेश सरकार व स्थानीय सार्वजनिक यातायातया हकय् स्थानीय सरकार वा सम्बन्धित निकायपाखें समायोजन मजूतले तक साविक बमोजमया हे भाडादर लागू जुइगु व्यहोरा सम्बन्धित फुक्कसित जानकारी ब्यूगु दु ।’

पेट्रोलियम पदार्थ व गाडीया पार्टपूर्जाया मूल्यबृद्धियात आधार दयेकाः सरकारं ताःहाकःगु दूरीइ चलेजुइगु सवारीया भाडाय् २० निसें २८ प्रतिशततक भाडा थकाःगु खः ।

यातायात व्यवस्था विभागं दयेकूगु कार्यदलं दयेकूगु प्रतिवेदन कथं वंगु असार २७ गते तत्कालीन भौतिक पूर्वाधार व यातायातमन्त्री बसन्त नेम्वाङया मन्त्रिस्तरीय निर्णयपाखें अन्तर प्रदेश चलेजुइगु सार्वजनिक यातायातया भाडादर कायम याःगु दु ।

सार्वजनिक यातायात संचालनलिसे सम्बन्धित लगानी व खर्च सम्बन्धय् विभागं याःगु बजार अध्ययन व सरोकारवाला पक्षतलिसे याःगु परामर्श तकंया आधारय् पहिचान याःगु यातायात, श्रमिकया पारिश्रमिक, इन्धन, टायर, ब्याज, संचालन खर्च, हासकट्टी व संचालनया मुनाफा लिसेंया मू सूचकय् खनेदूगु मूल्यवृद्धिया आधारय् अन्तर प्रदेश चलेजुइगु सवारीया भाडा थकाःगु खः ।

विभागया कथं प्रदेश दुनेया छगू स्थानीय तहपाखें मेखे व छगू जिल्लापाखें मेखे चलेजुइगु सवारीया हकय् प्रदेश सरकारं हे व स्थानीय तह दुने सम्बन्धित स्थानीय सरकारं हे भाडा समायोजन यायेमालीगु जुइ ।

तर, भाडा थकायेगु निर्णय मजुवं हे प्रदेशस्तरीय व स्थानीय रुटय् भाडा थकाःबलय् नं अनुगमन यानाः कारवाही यायेगु प्रक्रिया न्ह्यःने वंगु मदुनि । यातायात व्यवसायीं संघ सरकारं थकाःगु हे दरय् स्थानीय तह व प्रदेशय् चलेजुइगु सवारीया भाडा समायोजन यायेत माग यानाः वयाच्वंगु दु ।

प्रदेश व स्थानीय रुटय् औपचारिक रुपं भाडा थमकाःगुलिं यातायात व्यवसायीपिं आन्दोलित जूगु दु ।

Categorized in बजाः