नेवा: अनलाइन न्युज – ललेन्द्र शाक्य | २०७९ फाल्गुण २६, शुक्रबार १२:२७:३७

प्रधानमन्त्री पुष्पकमल दाहाल प्रचण्डया रिटय् थौं शुक्रवाः सुनुवाई जुइगु जूगु दु । सुनुवाईया नितिं बिहिवाः पेशी क्वःछ्यूगु उगु रिट स्वयेत मलाःगुलि लाःगु खः ।

उगु रिट थौं शुक्रवाः न्यायाधीश ईश्वरप्रसाद खतिवडाया एकल इजलासय् लाःगु दु । प्रचण्डं २०७६ साल माघ १ गते माघीया लसताय् तिंख्यलय् ग्वसाः ग्वःगु ज्याझ्वःयात सम्बोधन यासें माओवादी जनयुद्धलिसे सम्बन्धित विवादास्पद अभिव्यक्ति ब्यूगु खः ।

प्रचण्डं थःत १७ हजार हत्या याःगु द्वपं लानाच्वंगु धासें फुक्क द्वपं दःत ब्यूसा अन्याय जुइगु धाःगु खः । तर थःम्हं न्याद्वःया जिम्मा कायेत तयार जूगु व ल्यंदूगु झिंनिद्वःया जिम्मा तत्कालीन राज्य पक्षं कायेमाःगु प्रचण्डया धापू खः ।

वहे अभिव्यक्तियात आधार दयेकाः अधिवक्ता ज्ञानेन्द्र आरन, कल्याण बुढाथोकी लिसेंया २८ म्हेस्यां प्रचण्डयात तत्काल गिरफ्तार यानाः अनुसन्धान प्रक्रिया न्ह्यःने यंकेत आदेश माग यासें रिट निवेदन ब्यूगु खः ।

सर्वोच्चं सुरुइ उगु रिट दर्ता यायेत अस्वीकार याःगु खः । न्यायाधीश ईश्वरप्रसाद खतिवडा व हरि फुयाँलया मंकाः इजलासं उगु रिट दर्ताया आदेश ब्यूगु खः । संयोग थौंया सुनुवाई नं न्यायाधीश खतिवडाया एकल इजलासय् लाःगु दु ।

Categorized in दुर्घटना-अपराध