nepal investment baink

प्रचण्डया देउवालिसे गोप्य भेट : “जिं मेगु उथलपुथल यायेत बेर मदु !”

नेवा: अनलाइन न्युज – ललेन्द्र शाक्य | ने.सं. ११४४ चिल्लागा चौथी (२०८० चैत्र १६ गते) शुक्रवाः

प्रधानमन्त्री पुष्पकमल दाहाल प्रचण्डं न्हूगु सत्ता गठबन्धनं नं ज्या यायेमफुसा थः पद कःघानाः च्वनेगु पक्षय् मदूगु विचाः प्वंकूगु दु ।

सिंहदरबारय् बिहिवाः ग्वसाः ग्वःगु राष्ट्रिय विकास समस्या समाधान समितिया ५२ क्वःगु बैठकयात सम्बोधन यासें प्रधानमन्त्री प्रचण्डं परिणाम खनेदइगु कथं ज्या यायेगु नितिं हे न्हूगु सत्ता समीकरण दयेकागु धासें थः पद कःघानाः च्वनेगु पक्षय् मदूगु दाबी याःगु खः ।

प्रधानमन्त्री प्रचण्डलिसे नेपाली कांग्रेसया सभापति शेरबहादुर देउवाया गोप्य भेट जूगु कन्हय् कुन्हु हे मेगु उथलपुथलया खँ वःगु खः । थ्वसिबें न्ह्यः प्रधानमन्त्री प्रचण्डं कांग्रेसलिसेया सकार्य त्वाःथलाः एमालेलिसे सहकार्य याःगु हे दिं थः म्वानाः च्वंतले देसय् उथलपुथल जुइगु धाःगु खः ।

प्रचण्डं धाःगु दु, “सुशासन कायम यानाः विकासयात गति बिइगु ज्या नं जूगु दु । आः समीकरण हिलाबुला जूगु दु । गण्डकीया मुख्यमन्त्रीं उथलपुथलकारी पलाः धयादिल । उथलपुथल ला जिं धयागु खः । जिं धात्थें हे धाये छुं नं ज्या न्ह्यःने वनेमफुत धाःसा जिं मेगु उथलपुथल यायेत बेर मदु । व मेपिन्त धयागु मखु । जिगु नितिं हे धयागु खः ।”

Categorized in राजनीति