Arin Enterprises

प्रचण्डं माधव नेपाललिसे एकता याइगु

नेवा: अनलाइन न्युज – ललेन्द्र शाक्य | २०७९ मङ्सिर ८, बिहिबार १३:३५:०८

नेकपा माओवादी केन्द्रया नायः पुष्पकमल दाहाल प्रचण्डं माधवकुमार नेपाल नेतृत्वया नेकपा एकीकृत समाजवादी पार्टीलिसे एकता प्रक्रिया न्ह्याकूगु सीदूगु दु । निर्वाचनया सकतां लिच्वः सार्वजनिक जुइधुंकाः एकता प्रक्रिया न्ह्यःने यंकेगु प्रचण्डया धापू दु ।

प्रचण्डं धाःगु दु, ‘आः निर्वाचनया फुक्क लिच्वः वयेधुंकाः जिमिसं छगू समीक्षा बैठक यायेगु जुइ । आः नकतिनि लिच्वः वयाच्वंगु दु । सकतां लिच्वः वयेधुंकाः माधव नेपाललिसे वार्ता यानाः एकताया प्रक्रिया न्ह्याइ ।’

निर्वाचनया लिपांगु मतगणनाय् माओवादी केन्द्रया नेतापिं सन्तुष्ट जूगु मदु । प्रचण्डं चुनाव जुइन्ह्यः थःगु दल निर्वाचनलिपा नं निर्णायक स्वंगूगु शक्तिइ च्वनीगु धाःगु खः । व, गठबन्धनया हे नेतृत्वय् सरकार दयेकेगु प्रचण्डया दाबी खः । प्रारम्भिक लिच्वः स्वयेबलय् गठबन्धन चीब्यागु बहुमतपाखे हे न्ह्यःने वंगु दु ।

उखे, नेकपा एकीकृत समाजवादी पार्टीया सम्मान्ति नेता झलनाथ खनालं नं माओवादीलिसेया एकता न्ह्याकेगु विषयस सकारात्मक लिसः ब्यूगु दु । खनालं थःपिं निर्वाचन क्वचायेखतं सहलहस च्वनेगु जानकारी ब्यूगु दु ।

Categorized in राजनीति