nepal investment baink

प्यालेस्टाइनया पक्षय् अमेरिकाया विश्वविद्यालयस प्रदर्शन, न्युयोर्कंस्वसःम्ह ज्वन

नेवा: अनलाइन न्युज – ललेन्द्र शाक्य | ने.सं. ११४४ चिल्लागा चिल्लागा दशमि (२०८१ बैशाख २१ गते) शुक्रवाः

अमेरिकाया विश्वविद्यालयस प्यालेस्टाइनया पक्षय् प्रदर्शन चर्के जूगु दु ।

प्रदर्शनय् सहभागीपिंमध्ये स्वसःम्हेसित ज्वंगु दु । छुं छुं विश्वविद्यालयस तोडफोड व प्रहरीलिसे ल्वापु तकं जूगु दु ।

समाचार एजेन्सी एपीया कथं क्यालिफोर्निया युनिभर्सिटीइ झिंन्याम्ह घाःपाः तकं जूगु दु ।

इजरायलं प्यालेस्टाइनया गाजा क्षेत्रय् याःगु आक्रमणया विरोधय् अमेरिकाया फुक्क धयाथें विश्वविद्यालयस चीधंगु व तःधंगु प्रदर्शन जुयाः वयाच्वंगु दु । छुं छुं थासय् ल्वापु व तोडफोड जूगु बुखँ वयाच्वंगु दु ।

बीबीसीं कोलम्बिया युनिभर्सिटी व सिटी युनिभर्सिटी अफ न्युयोर्कय् स्वसःम्ह प्रदर्शनकारीपिन्त प्रहरीं ज्वंगु जानकारी ब्यूगु दु ।

न्युयोर्कया मेयर एरिक एडम्सया कथं कोलम्बिया युनिभर्सिटीं निवेदन बिइधुंकाः अन च्वनाः वयाच्वंपिं विद्यार्थीपिंविरुद्ध अभियान न्ह्याकूगु व ज्वनेगु ज्या याःगु जानकारी ब्यूगु दु ।

युनिभर्सिटी दुनेच्वनाः प्यालेस्टाइन समर्थकपिन्सं शान्तिपूर्ण प्रदर्शन यासें वयाच्वंगु खः । तर उगु प्रदर्शनय् घुसपैठ जूगु धासें प्रहरीं कारवाही अभियान न्ह्याकूगु खः ।

न्युयोर्कया मेयरं शहरया मेमेगु थाय्या सुरक्षायात नं ध्यान बिसें प्रहरीं कारवाही अभियान न्ह्याकीगु धाःगु दु । शान्तिपूर्ण प्रदर्शन यायेगु अधिकार दुसां नं हुलहुज्जत, तोडफोड व शान्ति सुव्यवस्थायात खलल यायेमज्यूगु मेयरया धापू दु ।

विद्यार्थीपिन्सं न्युयोर्क, टेक्सस, कोलम्बिया, जर्ज वाशिंटन, इन्डियाना युनिभभर्सिटी अफ पेन्सेल्भेनिया लिसेंया थासय् प्रदर्शन यानाः वयाच्वंगु दु ।

जर्ज वाशिंटन युनिभर्सिटीइ विद्यार्थीपिन्सं याःगु प्रदर्शनय् समर्थन प्वंकेत रिपब्लिकन सांसदपिंतकं थ्यंकूगु खः ।

टेक्सस युनिभर्सिटीइ छम्ह पत्रकार तकं गिरफ्तारीइ लाःगु खः तर लिपा व रिहा जूगु खः ।

प्यालेस्टाइनया पक्षय् अमेरिकालिसें इजिप्टया कायरो, फ्रानसया पेसिर, अष्ट्रेलियाया सिड्नी लिसेंया थासय् नं प्रदर्शन जुयाः वयाच्वंगु दु ।

Categorized in अन्तर्राष्ट्रिय