prabhu baink new

प्याजया मू छाय् थिकेजुल ?

नेवा: अनलाइन न्युज – ललेन्द्र शाक्य | २०७७ आश्विन २, शुक्रबार १५:३१:३८

कालिमाति बजारय् थौं प्याजया थोक मू प्रतिकेजी ११० तका दां थ्यंगु दु । स्वन्हु न्ह्यःतक प्रतिकेजी ५० निसें ६० तका दामं न्यायेदूगु प्याज चाचां मूल्यबृद्धि जुयाः सच्छिं मल्याक थ्यंगु खः । आखिर छाय् प्याजया मूल्यबृद्धि जुल ? २३ अर्ब ३१ करोड भारतीय दांया प्याज निर्यात जूगु खः । गुगुमध्ये ४ प्रतिशत नेपालय् निर्यात जूगु तथ्यांक दु । थुकिया अर्थ नेपाः भारतलिसे प्याजय् निर्भर जू ।

देसय् नखःचखःया मौसम सुरु जुइत्यंगु दु । उपभोक्ताया भुतुलिइ प्याजया माग अप्वयाच्वंगु दु । माग अप्वयाः वंगु व आपूर्ति म्हो जूगु नं मूल्यबृद्धिया हुनि खः । थ्व अवस्था वःगुल मू निगू हुनि दु । नेपाली बजाः प्याजय् भारतलिसे अप्वः निर्भर जूगु दु । नेपालय् स्वदेशय् हे उत्पादित प्याजलिपा भारतपाखें आयातित प्याजया माग अप्वः जू ।

एपीइडीएया कथं भारतं आर्थिक दँ २२०११९ व २०२० य् मुक्कं निर्यातया ४ प्रतिशत नेपालय् प्याज निर्यात याःगु खः । व साढे ४ करोड केजी प्याज खः । गुकिया मू ९० करोड भारतीय दांसिबें अप्व्ः जू वः । थुकिया अर्थ नेपालय् वंगु दँ डेढ अर्ब नेपाली तका दां बराबरया प्याज निर्यात जूगु दु । नेपाः भारत खुल्ला सीमा जूगुलिं मेमेगु मार्गपाखें नं तःधंगु परिमाणय् प्याज दुहाँ वइगु जुयाच्वंगु दु । थुकिया छुं लेखाजोखा मदु ।

तर, भारतय् प्याजया माग अप्वये धुंकाः निर्यात बन्द याःगु दु । भारतं प्याज निर्यात यानाः वयाच्वंगु देसत मध्ये बंगलादेश, मलेसिया लिसेंया देसय् तुरुन्त मूल्यबृद्धि जूगु दु । बंगलादेशय् ५० प्रतिशतं प्याजया मू बृद्धि जूगु दु । नेपालय् नं थ्यंमथ्यं शत प्रतिशतं मूल्यबृद्धि जुइधुंकूगु दु । थुकिया मू हुनि भारतं प्याज निर्यात दिकूगु, स्थानीय उत्पादन म्हो जूगु, भण्डारण मजूगु व कालोबजारी नं मू हुनि खः ।

भारतय् प्याजया अभाव जुइधुंकाः नेपाली बजारय् थुगुखुसि लिच्वः लाःगु खः । ब्यापारीं प्याज सुचुकेगु पलाः न्ह्याकेधुंकूगु दु । कालोबजारी सुरु जुइधुंकूगु दु । आः सरकारं कालोबजारी याइपिन्त धमाधम कारवाही यायेगु धाःसां नं मू सच्छिं मल्याक थ्यनेधुंकूगु दु ।

भारतं थौंनिसें हे प्याज निर्यात याकेब्यूसां नं स्थानीय बजाः अझ नं लच्छितक लिच्वः लाइगु निश्चित प्रायः जूगु दु । नखःचखःया इलय् उपभोक्तापिन्त मारय् लाइगु व्यवसायीया शैली व नियत विगतनिसें हे खनेदूगु खः ।

नेपालय् प्याजया उत्पादन म्हो जुजुं वंगु, भारतलिसे प्याजय् अप्वः निर्भर जूगु, व्यवसायीं मौका लाकाः प्याजया कृत्रिम अभाव ब्वलंकूगु, नखःचखतय् प्याजया कालोबजारी जूगुलिं नं मू चर्को जूगु खः ।

सरकारं कालोबजारी नियन्त्रण यायेमफूगु, प्याजया भण्डारण व्यवस्था मजूगु व किसानपिंके प्याज उत्पादनप्रति आकर्षण मजूगुलिं नं उपभोक्ता मारय् लाःगु खः ।

Categorized in बजाः