prabhu baink new

प्याजया मिइगु मू स्थानीय प्रशासनं क्वःछित

नेवा: अनलाइन न्युज – ललेन्द्र शाक्य | २०७७ आश्विन ५, सोमबार ११:३५:१३

भारतं प्याजया निर्यातय् रोक तयेधुंकाः नेपालय् उकिया कृत्रिम अभाव ब्वलनाः थिकेगु मूपाखें मियाच्वंपिं व्यवसायीपिन्त पर्सा प्रशासनं कारवाही याःगु दु । व्यवसायीपिन्सं प्याजया कृत्रिम अभाव क्येनाः अप्वः मू कयाः मिइगु ज्या यायेधुंकाः स्थानीय प्रशासनं उज्वःपिं व्यापारीपिनिगु गोदाम छापा मारे यायेधुंकाः कारवाही प्रक्रिया न्ह्यःने यंकूगु खः ।

वीरगञ्ज बजाः तरकारीया मू मण्डी कथं कयातःगु मीना बजाःया सुंसुं व्यापारीं प्याजया कृत्रिम अभाव ब्वलंकाः उपभोक्तापिन्त ठगी यानाः वयाच्वंगु खवर वयेखतं स्थानीय प्रशासनं छापा मारेयायेगु ज्या न्ह्याकूगु खः । प्रशासनं व्यापारीपिन्त प्याज मिइगु नितिं मू क्वःछी धुंकाः स्थानीय उपभोक्तपिन्त राहत जूगु उपभोक्ता विजय पण्डितं धाःगु दु ।

पर्साया प्रमुख जिल्ला अधिकारी अस्मान तामांग व व्यापारीपिं दथुइ जूगु सहलहपाखें प्याखजा मू क्वःछ्यूगु सामुदायिक प्रहरी सेवा केन्द्रया नायः विदुर गुप्तां धाःगु दु । स्थानीय प्रशासनय् च्वंगु सामुदायिक सेवा केन्द्र व सामुदायिक प्रहरी सेवा केन्द्रया आइतवाः च्वंगु बैठकं आःया प्याजया थोक मू प्रतिकेजी ६५ तका व खुद्रा मू ७५ तका क्वःछ्यूगु जिल्ला प्रशासन ज्याकुथि पर्सां जानकारी ब्यूगु दु ।

थ्वसिबें न्ह्यः व्यापारीपिन्सं कृत्रिम मू ब्वलंकाः प्रतिकेजी १०० तका दामं मियाः वयाच्वंगु खः । क्वःछ्यूगु मूसिबें अप्वः दां कयाः प्याज मिइगु ज्या यातधाःसा स्थानीय प्रशासनं कानूनक कथं कारवाही यायेगु धाःगु दु । थुकिया लिसें व्यापारीपिन्सं आलु, प्याज लिसेंया खाद्य सामाग्रीया मू नं थकयाः कालोबजारी याःगु उजुरी वःसां नं कारवाही यायेगु जानकारी ब्यूगु दु । वीरगञ्जय् थोक व खुद्रा विक्रेताया ल्याः ५०० या हाराहारीइ दु ।

भारतं प्याजया निर्यातय् रोक तयेधुंकाः वीरगञ्ज नाका जुयाः छगः नं प्याज ज्वनावःगु ट्रक नेपाः दुहाँ वःगु मदु । थ्वसिबें न्ह्यः वीरगञ्ज भन्सार नाकापाखें न्हिं स्वंगः ट्रकसिबें अप्वः प्याज  नेपाः दुहाँ वइगु वीरगञ्ज भन्सार ज्याकुथिया सुचं अधिकारी विमलकुमार साह नं धाःगु दु । थुखे प्याजया अभाव जुइधुंकँः सीमावर्ती नाका रक्सौलं तस्कपिन्सं साइकलय् तयाः नेपाःपाखे प्याजया तस्करी यायेगु पलाः ल्ह्वनाहःगु सीदूगु दु ।

Categorized in बजाः