prabhu baink new

प्याजया कालोबजारी याःगु द्वपनय् निम्ह व्यापारी गिरफ्तार

नेवा: अनलाइन न्युज – ललेन्द्र शाक्य | २०७७ आश्विन ५, सोमबार ११:५६:४९

प्याजया कालो बजारी याःगु द्वपनय् विराटनगरया निम्ह व्यापारीपिन्त प्रहरीं गिरफ्तार याःगु दु । विराटनगर गुद्री बजारय् ४७ तका दामं खरिद याःगु प्याज १०० तका दामं म्यूगु द्वपनय् निम्ह व्यापारीपिन्त आइतवाः प्रहरीं गिरफ्तार याःगु खः ।

भारतं निर्यात ठप्प यायेधुंकाः विराटनगरलिसें देय् न्यंकं प्याजया अभाव जुयाच्वंगु दु । अभावय् कालोबजारी याःगु द्वपनय् विराटनगर महानगरपालिका वडा ल्याः ९ या ३८ दँया संजयकुमार गुप्ता व २९ दँया मुकेशकुमार सहनीयात प्रहरीं गिरफ्तार याःगु खः ।

जिल्ला प्रहरी ज्याकुथि मोरंगया प्रहरी नायव उपरीक्षक मानबहादुर राईया कथं विजयकुमार योगेश पसः संचालन यानाः वयाच्वंम्ह गुप्ता व तनिसा टे्रडर्स पसः संचालन यानाः वयाच्वंम्ह साहनीं ४७ तका प्रतिकेजी खरिद याःगु प्याज १०० तका प्रतिकेजी दामं मियाच्वंगु खः ।

कालोबजारीया सुचं वयेखतं ग्राहक जुयाः प्रहरीं निम्हेसित गिरफ्तार याःगु खः । गिरफ्तारीइ लाःपिन्त कालोबजार व छुं मेमेगु सामािजक अपराध व सजाय ऐन २०३२ कथं कारवाही प्रक्रिया न्ह्यःने यंकूगु डिएसपी राई नं जानकारी ब्यूगु दु ।

Categorized in दुर्घटना-अपराध