Header Nepal rastra bank Adv

प्यन्हुया दुने २ लख २० हजारं त्वःतल स्वनिगः

नेवा: अनलाइन न्युज – ललेन्द्र शाक्य | २०७९ बैशाख २८, बुधबार १६:०५:४३

लिपांगु प्यन्हुया दुने जक थ्यंमथ्यं २ लख २० हजारसिबें अप्वः मनूतसें सतकमार्ग जुयाः स्वनिगः त्वःतूगु दु । महानगरीय ट्राफिक प्रहरी महाशाखाया कथं चुनाव लिक्क वयेधुंकाः स्वनिगः दुहाँ वइपिनिगु ल्याः म्हो जूगु व पिहाँ वनीपिं यात्रुपिनिगु ल्याः ह्वात्त हे अप्वःगु दु ।

बैशाख २७ गते मंगलवाः जक थ्यंमथ्यं ५९ हजार ८१ म्हेस्यां स्वनिगः त्वःतूगु दु । २६ बैशाखय् उगु ल्याः ५० हजार ९३० खःसा २५ बैशाखय् ५५ हजार ७४६ म्हेस्यां स्वनिगः त्वःतूगु खः । २४ बैशाखय् ५३ हजार मनुखं स्वनिगः त्वःतूगु महानरीय ट्राफिक प्रहरी महाशाखां जानकारी ब्यूगु दु ।

स्वनिगः दुहाँ वःपिं यात्रुया ल्याः धाःसा छुं दिं थुखे सामान्य अवस्थाया सिबें म्हो जूगु महाशाखां जानकारी ब्यूगु दु । बुधवाः धाःसा पिहाँ वनीपिनिगु ल्याः ह्वात्त हे अप्वःगु अनुमान याःगु दु ।

बुधवाः नाकाय् यात्रुया चाप उच्च जूगु दु । स्वनिगः त्वःतूगु बसय् नं कोचाकोच यानाः यात्रुपिं छेँ लिहाँ वंगु दु । स्वनिगलय् हे स्थायी बसोबास यानाच्वंपिं नं भोट कुर्कुेत गामय् वंगु दु । बिहिवाःतक हे सवारीया यात्रुपिनिगु चाप उच्च जुइगु अनुमान ट्राफिक प्रहरी महाशाखां याःगु दु ।

Categorized in बजाः