zero media family planning adv

प्यख्येंर घेराबन्दीइ प्रम ओली : छु जुइगु खः सत्ता संकट ?

नेवा: अनलाइन न्युज – ललेन्द्र शाक्य | २०७७ चैत्र ३, मंगलबार १५:४३:०३

प्रधानमन्त्री केपी शर्मा ओली राजनीतिक जीवनया हे दकले तःधंगु घेराबन्दीइ लाःगु दु । निक्वःतक थःविरुद्धया घेराबन्दी तोडेयानाः सत्ता संकट टारेयाःम्ह ओलीयात थुगुखुसि धाःसा अतिकं तःधंगु ख्याच्वः जूगु दु ।

ओली थुज्वःगु घेराबन्दीइ दु कि छुं नं इलय् वया सत्ताय् छापामार शैलीया प्रहार जुइफु । नेकपा एमाले दुने ओली घेराबन्दीइ दु । नेपाली कांग्रेस, माओवादी केन्द्र व जनता समाजवादी पार्टीपाखें नं ओली घेराबन्दीइ लायेधुंकूगु दु ।

एमाले दुने माधवकुमार नेपापल, झलनाथ खनाल व बामदेव गौतमं ओलीयात घेराबन्दीइ लाकूगु दु । उपिं स्वम्ह नेता छप्पं जूबलय् ओली पार्टी दुने हे मछिंगु अवस्थाय् थ्यनेत्यंगु दु ।

कांग्रेस, माओवादी केन्द्र व जसपाया ओलीविरुद्ध समीकरण दयेकेगु सम्भावना अप्वयाः वयाच्वंगु दु । स्वंगुलिं दल छप्पं जुयाः ओलीयात घेराबन्दीइ तयेगु माओल ब्वलनाः वयाच्वंगु दु । ओलीयाके स्वंगू दल छप्पं जुयाः न्ह्यःने वलधाःस कठिन परिस्थिति वयेफु । ओलीया सत्ता क्वःदलेफु ।

ओलीयाके आः घेराबन्दी तोडेयायेगु छुं विकल्प जक ल्यंदनि । नेकपा एमाले छप्पं यायेगु व माओवादी केन्द्रलिसे सहकार्य वा एकता यायेगु विकल्प जुइफु । उकिया नितिं ओलीं प्रधानमन्त्री पद त्याग यायेमाः, गुकी सहमत मदु । प्रधानमन्त्रीइ कायम हे च्वनाः माधव नेपाल व प्रचण्डयात साथ कायेगु सम्भावना असम्भवप्रायः खनेदु ।

नेपाली कांग्रेसया हे साथ कायेगु आशा नं ओलीयाके दु । निर्वाचनय् वनेगु सर्तय् व छुं सम्भव जुइफु । तर, कांग्रेस दुने ओलीयात समर्थन याइगु विपक्षय् माहोल दु । कांग्रेसयात सरकारया नेतृत्व बियाः ओली न्ह्यःने वनेगु लिपांगु अस्त्र नं जुइफु । उज्वःगु समीकरणया विपक्षय् कांग्रेस बरिष्ठ नेता रामचन्द्र पौडेल खनेदु ।

जनता समाजवादी पार्टीया साथ कायेगु ओलीया रणनीति खनेदु । तर, जसपा ओलीलिसे मिलेजुयाः वनेत तयार मदु । जसपायात सरकारया नेतृत्व बियाः ओली न्ह्यःने वनेगु विकल्प नं दु ।

घेराबन्दी तोडेयायेगु मेगु विकल्पय् जसपा विभाजन याकाः न्ह्यःने वनेगु नं जुइफु । तर, जसपा विभाजन जुइगु सम्भावना कमजोर जू । थथे ओली प्यख्येंरं घेराबन्दीइ दु, गुकियात तोडेयायेगु ज्या अःपू मजू ।

Categorized in बिचा: