Mohanai 2078 KTM

प्यक्वःगु संस्करणया पेजथ्री पिपल्स च्वोइस अवार्ड जुइगु

नेवा: अनलाइन न्युज – ललेन्द्र शाक्य | २०७८ आश्विन २४, आइतबार ११:३५:५६

(थन क्लीक यानाः भिडियो स्वयादिसँ)

थनिं झिनिदँ न्ह्यः निसें न्ह्यानाच्वंगु पेजथ्री बाःछिपौया न्ह्यब्वया पेजथ्री पिपल्स च्वोइस अवार्ड प्यक्वःगु संस्करणया घोषणा येँया विशालबजारय्  च्वंगु बेन्टो लाउन्ज एण्ड बारय् जुल ।

अवार्ड अन्तर्गत न्हापाथें हे नेपालभासाया मनोरंजन ख्यः कथं संगीत ख्यः, संकिपाः ख्यः व म्यूजिक भिडियो ख्यःयात कःघाना अवार्ड बिइगु जानकारी पेजथ्री अवार्डया कजि दर्शनवीर शाक्यं प्रेस सम्मेलन याना बियादिल ।

पेजथ्री पिपल्स च्वइस अवार्डंं ११४२ य् पेजथ्री अवार्ड ११३७ या संस्करण लिपानिसें ११४१ कौलागा चौथी अर्थात विसं २०७४ साउन २० निसें विसं २०७८ कार्तिक १४ गते तक्कया नेपालभासाया संकिपा, म्युजिक भिडियो व संगीतया कृति दुथ्याइगु जानकारी नं ब्यूगु खः ।

थुगु हे ई दुने दर्ता जूगु कृतिपाखें हे ज्युरी प्यानलं नामांकन ल्यइगु व उकियात हे भोटिंगया आधारय् पिपल्स च्वोइस अवार्ड ल्यइगु खँ नं जानकारी ब्यूगु दु । ज्याझ्वलय् पेजथ्री अवार्डया मेम्ह दुजः अर्विन्द्रमान सिंपाखें अवार्डया नियम व फारम भरेयायेगु बिषय जानकारी बियादीगु खः।

१६ वडा यलया अध्यक्ष म्येच्वमि निर्मलरत्न शाक्य व नेपालभाषा म्युजिक भिडियोया न्हापांम्ह निर्देशक बिजयरत्न असंबरे पाहां कथं अवार्डया घोषणा ज्याझ्वलय् उपस्थित जुयादीगु खः ।

निर्मलरत्न शाक्यं आः पेजथ्री अवार्ड राज्यस्तरं हे न्ह्याकेमाःगु खँतयादिल । वरिष्ठ सिने पत्रकार विजयरत्न असंबरें अवार्डयात विवादित मयासे झी न्ह्यां वनेमाः धकाः सन्देश बियादिल ।

ईलोहं प्रकाशनया प्रबन्ध निर्देशक नरेशवीर शाक्यं मनोरंजन ख्यःयात हःपाः बिइगु निंतिं ईलोहं प्रकाशनं पेजथ्री अवार्ड यानाच्वनागु खँ धयादिल । ज्याझ्वःया अन्तय् अन्तरक्रियात्मक न्ह्यसःलिसः नं जूगु खः ।

थुगु संस्करणय् स्वतां ख्यः पाखें मुक्कं ३७ गू पिपल्स च्वोइस अवार्ड बिइगु धाःगु दुसा कृति दुथ्याःगु आधारय् न्हूगु विधाः नं थप जुइ । पेजथ्री संगीत अवार्डय् भजन संगीत व पुचः म्ये नं विधा कथं दुथ्याकेगु धाःसें थुगुसी विशेष रुपं ज्यूरी अवार्डनं दुथ्याइगु जूगु दु ।


थुकिया निंतिं ज्युरी पाखें हे निर्णय यायेफइगु ग्वसाः नं ग्वयातःगु दु । लिसें लाइफटाइम एचिभमेन्ट अवार्ड मनोरंजन क्षत्रय् योगदान याःम्ह व्यक्तियात नं लःल्हाइ ।

अवार्डय् दर्ता यायेगु निंतिं छपू म्ये वा म्युजिक भिडियोया निंतिं द्वःछि तका क्वछिनातःगु दु । द्वःछि तका पुलेवं उकिया कलाकार एवं प्राविधिक फुक्कं हे दुथ्याइगु खःसा नेपालभासाया प्याखँया नितिं धाःसा मुक्कं स्वीन्यासः तका क्वछिनातःगु दु ।

पेजथ्री अवार्डया घोषणा असोज २३ गते जुगु खःसा, कार्तिकया १४ गते तक्क नां दुथ्याइ, अनं पुषया १० गते नामांकन ज्याझ्वः जुइ अले पुषया २४ गते पेजथ्री अवार्डया मू ज्याझ्वः ग्राण्ड फिनाले जुइ ।

(थन क्लीक यानाः भिडियो स्वयादिसँ)

https://www.youtube.com/watch?v=eVdObllwuK4

Categorized in कला