city axpris 2

पोखराय् प्याराग्लाइडिङ बन्द

नेवा: अनलाइन न्युज – ललेन्द्र शाक्य | २०८० पौष १, आइतबार ११:४९:०२

नेपाल नागरिक उड्डयन प्राधिकरणं पोखराय् संचालन जुयाः वयाच्वंगु प्याराग्लाइडिङ उडान बन्द याःगु दु ।

नेपाल हवाई खेलकुद संस्था पोखरां उगु संस्थाय् आबद्ध प्याराग्लाइडिङ कम्पनीं थः यत्थे उडान दर कायम यायेगु निर्णय यायेधुंकाः प्याराग्लाइडिङ चालक आन्दोलित जूगु खः ।

प्राधिकरणया सुचं अधिकारी ज्ञानेन्द्र भुलं प्याराग्लाइडिङ कम्पनीया निर्णयस ७० सिबें अप्वः प्याराग्लाइडिङ कम्पनीया थ्यंमथ्यं १०७ प्यारापाइलटं असहमति प्वंकूसें आन्दोलन न्ह्याकेधुंकाः उडान द्यूगु जानकारी ब्यूगु दु ।

प्राधिकरणं पोखराय् प्याराग्लाइडिङ उडान व्यवस्थापनया भाला नेपाल हवाई खेलकुद संस्थायात ब्यूगु दु । वहे आधारय् प्याराग्लाइडिङया उडान शुल्क उगु संस्थां हे निर्धारण यानाः वयाच्वंगु खः ।

वं प्यारा पाइलटं थः यत्थे उडान दर क्वःछ्यूबलय् दंक उडान जुइगु व अस्वस्थ प्रतिस्पर्धा अप्वइगु धासें छगूद्वार प्रणालीपाखें दररेट क्वःछीमाःगु अडान तःगुलिं विवाद समाधान जुइधुंकाः जक उडान चायेकेगु धाःगु दु ।

नेपाल प्याराग्लाइडिङ पाइलट्स क्लब पोखरां नेपाल हवाई खेलकुद संस्था सिन्डिकेटया विपक्षय् खनेदूगु धासें दंक व थः यत्थे उडान यायेत असमर्थ जूगु जानकारी ब्यूगु दु ।

क्लबं कम्पनी कम्पनीदथुया द्वन्द्वया हुनिं प्याराग्लाइडिङया भविष्य सुनिश्चित मजूगुया लिसें चालक पलायन जुइगु व उडान सुरक्षा मजुइगु धासें प्यारा पाइलट उडानय् संलग्न मजुइगु जानकारी ब्यूगु दु ।

वंगु १६ महिनानिसें छगूद्वार प्रणालीपाखें उडान जुयाच्वंगुलिं हाकनं छगूद्वार प्रणालीपाखें सेवा सुचारु जुइमाःगु पाइलट्स क्लबं जानकारी ब्यूगु दु ।

थ्वसिबें न्ह्यः छम्ह जक यात्रुयात प्याराग्लाइडिङय् ब्वयेकूगु बापतया शुल्क ७० प्रतिशत कम्पनी व ३० प्रतिशत पाइलटं कयाः वयाच्वंगु खः ।

Categorized in कासा