नेवा: अनलाइन न्युज – ललेन्द्र शाक्य | २०७७ आषाढ ११, बिहिबार १५:३५:५८

पोखराय् कोरोना संक्रमित मनूतय्गु सीम्ह व्यवस्थापनय् स्थानीय बासिन्दां पंगः थंगु दु ।

पश्चिमाञ्चल क्षेत्रीय अस्पतालय् सीपिं स्याङजाया संक्रमितया सीम्ह पोखरा महानगरपालिका ३२ तल्लो गगनगौंडाय् च्वंगु सेतीघाटय् व्यवस्थापन यायेत्यंबलय् स्थानीयं टायर च्याकाः विरोध प्रदर्शन याःगु खः ।

सीम्ह व्यवस्थापनया नितिं डोजरं गाः म्हुयाच्वंगु सीकेखतं स्थानीय बासिन्दां आन्दोलन यानाः सीम्ह यंकेत पंगः थंगु खः । तर सुरक्षा निकायं सीम्ह व्यवस्थापनया नितिं घाटपाखे यंकाच्वंगु इलय् प्रहरी व स्थानीय बासिन्दादथुइ ल्वापु जूगु खः ।

ल्वापुइ निम्ह प्रहरी व १० म्ह सिबें अप्वः स्थानीय बासिन्दा घाःपाः जूगु दु । प्रहरीं ८ म्हेसित नियन्त्रणय् काःगु दु । कास्कीया प्रहरी प्रवक्ता सुवास हमालं सीम्ह व्यवस्थान यानाः लिहाँ वयेगु झ्वलय् ल्वापू जूगु धाःगु दु । हमालं धाःगु दु, “सुरुनिसें हे पंगः ब्वलनाच्वंगु खः । लिपा सद्गद् यानाः लिहाँ वयेगु झ्वलय् स्थिति असामान्य जूगु खः । नाकाय् चेकिङा नितिं तयातःगु टेन्टय् सामान्य क्षति जूगु दु ।”

ल्वापु नियन्त्रणय् कायेत सशस्त्र प्रहरीं हवाई फायर याःगु खः ।

थ्वसिबें न्ह्यः कास्कीइ कोरोनाया हुनिं सीम्ह स्याङजाया ६० दँया छम्ह मिजंया सीम्ह व्यवस्थापनय् नं स्थानीय बासिन्दां पंगः थंगु खः ।

जेठ २५ गते सीम्ह उम्ह मनूया सीम्ह पोखरा ११ व २० या सीमानाय् व्यवस्थापन याःगु खः ।

बस्ती लिक्क जूगु व विश्व स्वास्थ्य संगठनया मापदण्ड अःखः सीम्ह व्यवस्थापन यायेत यंकूगु धासें जनप्रतिनिधिं हे पंगः थंगु खः । उगु इलय् नं प्रहरी व स्थानीय दथुइ ल्वापु जुयाः वडाध्यक्षलिसें सुं सुं प्रहरी तकं घाःपाः जूगु खः ।

Categorized in दुर्घटना-अपराध