nepal life 2076 3 18

पेरु कम्युनिष्ट क्रान्तिया नेता गोन्जालो मन्त

नेवा: अनलाइन न्युज – ललेन्द्र शाक्य | २०७८ भाद्र २७, आइतबार ०८:०१:३८

पेरु क्रान्तिया नेता गोन्जालो मन्त । गोन्जालो जेलय् हे च्वनाच्वंगु अवस्थाय् ८६ दँया उमेरय् मदूगु खः ।

गोन्जालो सन् १९९२ निसें जेलय् च्वनाच्वंगु खः । आतंक ब्वलंकूगु द्वपनय् गोन्जालोयात सरकारं आजीवन कारावासया सजायँ ब्यूगु खः ।

दार्शनिक नेता गोन्जालो हलिंन्यंकंया कम्युनिष्ट क्रान्तिकारीया प्रेरणाया स्रोत कथं नां जाः ।

सु खः गोन्जालो ?

गोन्जालोया वास्तविक नां अबिमेल गुजम्यान खः । वया जन्म सन् १९३४ स पेरुया दक्षिण तटय् च्वंगु मोलेन्डो सहर लिक्क जूगु खः ।

सन् १९९० या दशकय् पेरु कम्युनष्टि पार्टी  साइनिङ पाथया नायः गोन्जालोया नेतृत्वय् सशस्त्र जनयुद्ध न्ह्याःगु खः । गांनिसें सहर घेरेयायेगु रणनीति अन्तर्गत् उगु क्रान्तिं पेरुया आपालं गां व छुं छुं मू सहरत तकं कब्जा याःगु खः । साइनिङ पाथ राजधानी लिमालिसें केन्द्रीय सत्ता नं कब्जा यायेगु आज्जुया लिक्क थ्यनेधुंकूगु खः ।

थ्वहे झ्वलय् सन् १९९२ सेप्टेम्बर १२ तारिखया दिं राजधानी लिमा सहरया छखा छेँपाखें गोन्जालो गिरफ्तारीइ लात । वयात सैनिक जेलय् कुनाः आजीवन कारावासया सजायँ न्यंकल । निगूगु व स्वंगूगु तहतकया नेतापिं नं गिरफ्तारीइ लात ।

सन् १९८१ पाखें सुरु जूगु पेरुया कम्युनिष्ट क्रान्तिं गम्भीर धक्का नल । सन् १९९५ तक केन्द्रीय सत्ता कब्जा यानाः न्हूगु जनवादी क्रान्ति सम्पन्न यायेक्वचायेकेगु योजना सुथां लाकेमफुत । तर नं पेरुइ १९९९ तक न्ह्याःगु जनयुद्धया झ्वलय् ७० हजारम्ह मनूत सीगु खः ।

Categorized in अन्तर्राष्ट्रिय