Header Nepal rastra bank Adv

पेट्रोलियम पदार्थया मूल्यवृद्धिया हुनिं केयूकेएलं दिकल ट्यांकरपाखें त्वनेगु लः वितरण

नेवा: अनलाइन न्युज – ललेन्द्र शाक्य | २०७९ आषाढ ७, मंगलबार १६:२९:५०

काठमाडौं खानेपानी लिमिटेड (केयूकेएलं) ट्यांकरपाखें त्वनेगु लः वितरण ज्या दिकूगु दु ।

पेट्रोलियम पदार्थया मूल्यवृद्धिया हुनिं छुं ईया नितिं अस्पतालबाहेक मेमेगु क्षेत्रय् त्वनेगु लः वितरण दिकूगु ट्यांकर शाखाया प्रमुख इन्जिनीयर शंकर थापां जानकारी ब्यूगु दु ।

थापां धाःगु दु, ‘आः पेट्रोलियम पदार्थया भाः ह्वात्त हे थाहाँ वन । न्हापा विनियोजन याःगु बजेटं कःघायेफइगु अवस्था मन्त । साझायात जेठ महिनाया हे १८ निसें २० लख तका दां बक्यौता पुले ल्यंदनि । गुकिं यानाः साझां आः पेट्रोलियम पदार्थ बिइगु बन्द याःगु दु ।’

थापाया कथं केयूकेएलया ट्यांकर शाखां सुख्खा यामय् न्हिथं ८० निसें ९० ट्यांकर व मेमेगु मौसमय् ५० निसें ६० ट्यांकर त्वनेगु लः वितरण यानाः वयाच्वंगु दु ।

थापाया कथं केयूकेएलं त्वनेगु लः ट्यांकरया नितिं माःगु पेट्रोलियम पदार्थ जायेकेत साझा पेट्रोल पम्पलिसे सम्झौता याःगु खः । तर, बजेट मगाःगु हुनिं पेट्रोलियम पदार्थया रकम भुक्तानी यायेमफयेधुंकाः सेवा हे कटौती यायेमाःगु वया धापू दु ।

मानवीय संवेदनशीलतायात ध्यानय् तयाः अस्पतालय् धाःसा त्वनेगु लः वितरणयात नियमित यानागु थापां जानकारी ब्यूगु दु ।

केयूकेएलं सरकारी, सार्वजनिक क्षेत्र, नीजि क्षेत्र व नागरिकपिन्त त्वनेगु लः वितरण यानाः वयाच्वंगु दु ।

Categorized in बजाः